Home / Բանակ / Երասխի հատվածում երկու կողմից կան վիրավորներ

Երասխի հատվածում երկու կողմից կան վիրավորներ

Հուլիսի 19-ի ուշ երեկոյան և 20-ի գիշերը, մինչև ժամը 02։00, ադրբեջանական զինված ուժերը շարունակել են հրաձգային զինատեսակներից, առանց ականանետերի կիրառման, գնդակոծել հայ-ադրբեջանական սահմանի Երասխի հատվածում տեղակայված հայկական դիրքերը: Այս մասին հայտնում է Հայաստանի ՊՆ-ն։

«Մի քանի ժամ տևած ինտենսիվ փոխհրաձգության հետևանքով հայկական կողմից հրազենային վիրավորում է ստացել Երասխ համայնքի ղեկավար Ռադիկ Օղիկյանը, ով այդ պահին կազմակերպում էր ադրբեջանցիների գործողությունների արդյունքում տեղանքում բռնկված հրդեհը մարելու աշխատանքները։

ՀՀ զինված ուժերը հայտարարում է, որ շփման գծի որևէ փոփոխություն թույլ չի տալու»,- ասված է հաղորդագրության մեջ։

Ադրբեջանի ՊՆ-ն, իր հերթին, հայտարարել է, որ Նախիջևանի ուղղությամբ հրաձգության հետևանքով ոտքից վիրավորվել է ադրբեջանական բանակի ավագ լեյտենանտ Բադալի Ռամալը։

Ավելի վաղը, Հայաստանի ռազմական գերատեսչությունը հայտարարել էր, որ «հուլիսի 19-ի երեկոյան ադրբեջանական զինված ուժերը, ժամը 18:40-ից սկսած, մի քանի ժամ շարունակ, տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը: Պարբերաբար կիրառվել են նաև ականանետեր»:

Երասխի ուղղությամբ սահմանին իրավիճակը լարվել է անցյալ շաբաթվանից, հուլիսի 14-ին փոխհրաձգության հետևանքով հայկական կողմից զոհվել է մեկ զինծառայող, ադրբեջանական կողմից, ըստ պաշտոնական աղբյուրների, մեկ զինծառայող վիրավորվել է:

Tekali Taxi