Փրկարարները գետից դուրս են բերել Վաշինգտոնի ավիավթարի զոհերի մարմինները

Փրկարար ծառայության աշխատակիցները ամերիկյան Պոտոմակ գետից դուրս են բերել Վաշինգտոնի ավիավթարի 67 զոհերի մարմինները, ինքնաթիռի խցիկի և պոչի մասերը։ Մարմիններից 66-ը նույնականացվել են։ Ինքնաթիռի բեկորները գետից հավաքելու աշխատանքները շարունակվում են։ Տեղական իշխանությունները հայտնում են, որ գետը մաքրելու գործընթացը կտևի մի քանի օր։

Ավիավթարը տեղի էր ունեցել հունվարի 29-ի երեկոյան։ Վաշինգտոնից ոչ հեռու գտնվող Ռոնալդ Ռեյգանի անվան ազգային օդանավակայանում American Airlines ավիաընկերության ուղևորատար ինքնաթիռը վայրէջքի ժամանակ բախվել է ուղղաթիռին։ Օդանավում վթարի պահին 60 ուղևոր և 4 աշխատակից կար։ Ուղղաթիռը տեղափոխում էր 3 զինվորների։

Վթարի պատճառների մասին հետաքննությունը շարունակվում է։