Epress.am Լուրեր Հայաստանից
Արդարադատության նախարարությունը հրաժարվում է քննել առանձին դեպքեր` կապված ՔՀԿ-ներում Հասարակական վերահսկողություն իրականացնող դիտորդ խմբի կողմից հայտնաբերված իրավախախտումների հետ, այլ կողմ է միայն ընդհանուր մեխանիզմների և բարեփոխումների քննարկմանը: Այսպիսի հայտարարություն է արել ԱՆ խորհրդատու Նիկոլայ Առուստամյանն այսօր Դիտորդ խմբի նախաձեռնած 2011 թվականի ընթացքում տված հրատապ հաշվետվությունների քննարկման ժամանակ:
Նա նաև քննադատել է դիտորդ խմբի աշխատանքը` ասելով, թե խումբը բարձրացնում է հարցեր, որոնք չեն մտնում իր իրավասության տակ:
«2009, 2010 թվականի զեկույցները ձևական բնույթ են կրել: Ձևականությունը հասնում է այն աստիճանկի, որ copy-paste են արվում շատ հարցեր ամեն տարվա զեկույցում: Կոռեկտ չէ` ուսուցչի դեր տանել նախարարության գլխին»,- նկատել է Առուստամյանը:
Նա նաև հորդորել է չմոռանալ, որ կառույցը ստեղծվել է հենց Արդարադատության նախարարության կողմից, և ոչ թե միջազգային կառույցների դրդմամբ, ուստի նախարարությունը շահագրգռված է դրա արդյունավետությամբ, բայց ավելի «կոռեկտ» կլիներ քննարկումը հանրային չդարձնել:
Սույն հայտարարությանն անդրադառնալով`Դիտորդական խմբի նախագահ Արթուր Սաքունցն ասել է, որ հիմնահարցերը կրկնվում են, քանի որ նախարարությունը դրանց լուծում չի տալիս:
Խմբի մեկ այլ անդամ իրավապաշտպան Ավետիք Իշխանյանն էլ ասել է, որ իրականում խումբը չի ստեղծվել է որպես նախարարին կից կառույց: Նա նշել է նաև, որ չի փոխվել ՔՀԿ-ներում վիճակը ոչ միայն Դիտորդ խմբի գնահատմամբ, այլև միջազգային կառույցների, օրինակ, Պատժի կանխարգելման եվրոպական կոմիտեի կարծիքով: