Գլխավոր / Հայաստան / «Ձեր ղարաբաղյան խնդիրները ձեզ պահեք». սկանդալ Ղազախստանում

«Ձեր ղարաբաղյան խնդիրները ձեզ պահեք». սկանդալ Ղազախստանում

Ղազախստանի «Ատիրաու» ֆուտբոլային ակումբի նոր մարզիչ Ռամիզ Մամեդովը հայտարարել է, որ չի պատրաստվում աշխատել մի կոլեկտիվում, որտեղ հայեր կան: Մարզչի հայտարարությունը վրդովմունք է առաջացրել թիմի երկրպագուների մոտ:

Նշենք, որ «Ատիրաու»-ի կողմից հանդես էր գալիս Հայաստանի երիտասարդական հավաքականի նախկին հարձակվող Տիգրան Ղարաբաղցյանը:

Azerifootball.com-ին տված հարցազրույցում ադրբեջանցի մարզիչն ասել է. «Որքանով որ ես տեղյակ եմ, Ղարաբաղյանն այլևս «Ատիրաու» թիմի կազմում հանդես չի գալիս: Սակայն, եթե դա այդպես չէ, ես ստիպված կլինեմ խոսել ակումբի ղեկավարության հետ: Եթե ես աշխատում եմ «Ատիրաույում», այդտեղ հայ չպիտի լինի»:

Այս հայտարարությանն անմիջապես արձագանքել են ակումբի երկրպագուները.

«Մենք` «Ատիրաու» ակումբի երկրպագուներս, Մամեդովին տեղեկացնում ենք, որ Ղազախստանը բազմազգ պետություն է, որտեղ բնակվում են ավելի քան 100 ազգերի ներկայացուցիչներ, որոնք կողք կողքի ապրում են խաղաղության, բարեկամության և համաձայանության մթնոլորտում:

Մեր թիմում կողք կողքի միշտ խաղացել են ռուսներ, ադրբեջանցիներ, չեչեններ, ուկրաինացիներ և այլ ազգերի ներկայացուցիչներ: Իսկ ֆուտբոլային ակումբին մարզադաշտում երկրպագում են կրկին ազգային տարբեր պատկանելություն ունեցող մարդիկ:

Եթե դուք ազգային պատկանելությամբ եք ընտրում ֆուտբոլիստներին, դա խոսում է Ձեր մարդկային որակների մասին: Ղարաբաղցյանի մասին այդպիսի հայտարարություն անելը պարզապես անթույլատրելի է: Մեզ չեն վերաբերում ձեր ղարաբաղյան խնդիրները, ձեր խնդիրները ձեզ պահեք և թողեք Ադրբեջանում: Դուք արդեն Ղազախստանում եք: Այստեղ ազգայնամոլության համար տեղ չկա: Մեր երկրում և մեր քաղաքում անընդունելի է նման վերաբերմունքը:

Անգամ չսկսելով ակուբի մարզիչի Ձեր գործունեությունը` արդեն աջ ու ձախ նման ազգայնական հայտարարություններ եք անում: Դուք արդեն կորցրել եք երկրպագուների հարգանքը ձեր նացիստական հայացքների պատճառով»:
Tekali Taxi