Epress.am Լուրեր Հայաստանից
ԱԺ «Ժառանգություն» խմբակցության պատգամավոր Զարուհի Փոստանջյանի եղբոր Տիգրան Փոստանջյանի նկատմամբ առաջդրված մեղադրանքը նույն խմբակցության պատգամավոր Ստեփան Սաֆարյանը գնահատում է որպես «Ժառանգություն» կուսակցության նկատմամբ հաշվեհարդար` համարելով Փոստանջյանի եղբորը զոհ և նշելով, որ այդ հարվածը ուղղված է ոչ միայն Զարուհի Փոստանջյանին, այլև` «Ժառագության» կուսակցությանը:
Հիշեցնենք, որ, ըստ ՀՀ դատախազության, «երեք օր առաջ Երևան քաղաքի Արաբկիր վարչական շրջանի աշխատակազմի կոմունալ տնտեսության և բազմաբնակարան շենքերի կառավարման մարմինների հետ աշխատանքների կազմակերպման բաժնի առաջատար մասնագետ Տիգրան Փոստանջյանը պահանջել և ապօրինի ստացել է 100,000 դրամ վարձատրություն»:
«Երբ ուրբաթ օրը երեկոյան պարզ դարձավ, թե ինչ է կատարվում, կարելի է ասել, բառացի գործողության մեջ դրվեց կոալիցիոն հուշագիրը, այսպես ասած, առաջիկա ընտրություններին ընդառաջ ուղղակի քաղաքական հաշվեհարդարներ տեսնել բոլոր այն մարդկանց, բոլոր այն քաղաքական ուժերի հանդեպ, այն քաղաքացիական, հասարակական շարժումների և դրանց զորակցող մարդկանց հանդեպ, ովքեր կարող են սպառնալ իրենց իշխանությանը և աթոռները մեջ-մեջ անելուն»,- ասել է Ստեփան Սաֆարյանը:
Տիգրան Փոստանջյանի փաստաբան Հայկ Ալումյանը, ով ևս ներկա էր լրագրողների հետ հանդիպմանը պատմել է, որ ուրբաթ երեկոյան Տիգրան Փոստանջյանը անծանոթ մարդուց հեռախոսազանգ է ստացել, ով ասել է, որ իրեն ստիպում են Տիգրանի դեմ ցուցմունք տալ, քանի որ այդ մարդիկ ուզում են Զարուհի Փոստանջյանից հաշվեհարդար տեսնել:
Երբ Տիգրանը փորձել է հանդիպել այդ մարդու հետ, նա նշանակված ժամին և նշանակված վայր չի ներկայացրել: Եվ միայն դրանից հետո է Տիգրան Փոստանջյանը դատախազության կայքից տեղեկացել, որ իր նկատմամբ քրեական գործ է հարուցվել:
Փաստաբանը դա որակել է բիրտ ձևով մարդու իրավունքների խախտում:
«Հանրային ծառայողը ստացել է ապօրինի վարձատրություն: Ինչն է այստեղ ուշագրավ, որ քրեական գործ են հարուցել և մի անգամ նրան չեն կանչել հարցաքննության: Հիմա եթե ցանկացած մեկը հաղորդում ուղարկի դատախազություն` հանցագործության մասին, ապա դատախազությունն իրեն կվերապահի հայտարարել, որ այդ մարդը հանցագործ է»,- նշել է փաստաբանը:
Իսկ Զարուհի Փոստանջյանը հայտարարել է, որ ինքը որևէ բանից հետ չի կանգնելու: «Սա սրբազան պատերազմ է, մենք պատերազմելու ենք և հաղթանակած ենք դուրս գալու»,- ասել է ԱԺ պատգամավորը:
Նա վստահ է , որ դա պատվեր է. Փոստանջյանը չի բացառել, որ այդ պատվերը գալիս է ամենաբարձր ատյաններից:
Զարուհի Փոստանջյանի կարծիքով` նման հաշվեհարդարը գյումրեցի և վանաձորցի վարորդների բողոքի ակցիաներին իր մասնակցության արդյունք է:
Նա նշել է, որ գյումրեցի վարորդներն իրեն փոխանցել են ոստիկանների խոսքերը: Վերջիններս հանդիպել են բողոքող վարորդներին և ասել են, որ «Փոստանջյանը չի կարողանում իր եղբորը իրավունքները պաշտպանել, Ձերը ոնց ա պաշտպանելու»:
Ստեփան Սաֆարյանը, խոսելով այն մասին, թե ինչ ձևով է դատախազությունը Տիգրան Փոստանջյանի նկատմամբ քրեական գործ հարուցել, ասել է, որ, առաջնորդվելով նույն տրամաբանությամբ, հիմքում ունենալով Վիքիլիքս կայքի հրապարակումները, կարելի է հայտարարել, որ ՀՀ գլխավոր դատախազությունը կավատ է և զբաղվում է մարդկային առևտրով:
«Ժառանգության» պատգամավորները նաև տեղեկացերել է, որ նմանատիպ սպառնացող զանգեր իրենք միշտ էլ ստացել են, ուղղակի չեն ցանկացել բարձրաձայնել դա:
Սաֆարյանի խոսքով` այս գործելաոճը դատապարտված է ձախողման և իրենց կողմից լինելու է ոչ թե պաշտպանություն, այլ հարձակում: Փաստաբան Հայկ Ալումյանը, խոսքն ուղղելով գործը նախաձեռնողներին, ասել է, որ այն հասնելու է մինչև Եվրոպական դատարան, եթե «այս գծով շարունակվի»: