Հայաստանի խոշորագույն սուպերմարկետների ցանցը վաճառեցին

«Սթար Դիվայդ» ՓԲԸ-ի, որը գործարկում է Հայաստանում սուպերմարկետների «Սթար» խոշորագույն ցանցը, նոր բաժնետերը կդառնա Viest Assets Ltd-ն, որը գրանցված է  Բրիտանական Վիրջինյան կղզիներում: Viest Assets-ին կպատկանի «Սթարի» բաժնետոմսերի 100%-ը:

Ինչպես հաղորդում է «Սթար Դիվայդ» ընկերությունը, բանակցությունները առևտրային ցանցի ներկայիս բաժնետերերի հետ արդեն ավարտված են, իսկ իրավաբանական ձևակերպումները դեռևս ընթացքում են: Ենթադրվում է, որ իրավաբանական ձևակերպումները կավարտվեն 1 ամսվա ընթացքում:

«Ընկերության ձեռքբերման քննարկումներին նախորդել են բանակցություններ վարկատու բանկերի հետ, որի արդյունքում ՍԹԱՐ-ի ֆինանսական ողջ պարտքը կվերակառուցվի»,- նշել է ՍԹԱՐ առևտրային ցանցի գործադիր տնօրեն Վահան Քերոբյանը:

Նոր բաժնետերը, առաջիկա 3 ամիսների ընթացքում պարտավորվել է կատարել 5-10 մլն ԱՄՆ դոլարի ներդրում բաժնետիրական կապիտալի և պարտքի տեսքով:

«Ընկերության պարտավորությունները բոլոր մատակարարների նկատմամբ մնում է ուժի մեջ, որոնց մարման վերաբերյալ ընկերության ղեկավարությունը բանակցությունների նոր փուլ կսկսի մատակարարների հետ»,- ասել է Քերոբյանը:

Ընկերությունն իր հաղորդագրության մեջ նշում է, որ բաժնետերերի փոփոխման արդյունքում փոփոխությունները տեղի չեն ունենա ՍԹԱՐ առևտրային ցանցի ղեկավար անձնակազմում: Նախկինում քննարկված և ընկերության կողմից կազմված զարգացման և ընդլայնման ծրագրերը կմնան անփոփոխ. 2011թ.-ին ՍԹԱՐ-ը կբացի ևս 12 խանութ Երևանում և մոտակա քաղաքներում: