Home / Հայաստան / Հանդիպումներ Կանադայում. Ստեփանակերտն ու Քեմբրիջը կարող են քույր քաղաքներ դառնալ

Հանդիպումներ Կանադայում. Ստեփանակերտն ու Քեմբրիջը կարող են քույր քաղաքներ դառնալ

Հայ դատի հանձնախմբի հրավերով յոթօրյա այցով Կանադայում գտնվող Լեռնային Ղարաբաղի Հանրապետության արտաքին գործերի նախարար Գեորգի Պետրոսյանը մի շարք հանդիպումներ է անցկացրել այդ երկրի քաղաքական և կուսակցական շրջանակների ներկայացուցիչների հետ: Այս մասին հաղորդում է ԼՂԳ ԱԳՆ-ն:

Փետրվարի 18-ին և 20-ին Պետրոսյանը որպես գլխավոր բանախոս ելույթ է ունեցել Տորոնտոյում և Մոնրեալում արցախյան շարժման 23-րդ տարեդարձին նվիրված հանդիպումների ժամանակ: Ելույթի ընթացքում ԱԳ նախարարը շեշտել է Հայաստան-Արցախ-Սփյուռք ազգային ուժերի համատեղման անհրաժեշտությունը` ԼՂՀ հիմնահարցը բարեհաջող ավարտի հասցնելու առաքելության մեջ:

Տորոնտոյում Գեորգի Պետրոսյանը հանդիպում է ունեցել հայ քաղաքական կուսակցությունների` ՀՅԴ, Ռամկավար ազատական կուսակցության/ՌԱԿ/ և Սոցիալ-դեմոկրատ հնչակյան կուսակցության/ՍԴՀԿ/ ներկայացուցիչների, ինչպես նաև Հայ դատի հանձնախմբի անդամների հետ: Հանդիպումների ընթացքում նախարարն անդրադարձել է Ղարաբաղյան հիմնախնդրի կարգավորման ուղղությամբ ընթացող բանակցությունների վերջին զարգացումներին:

ԼՂՀ արտաքին գերատեսչության ղեկավարը հանդիպում է ունեցել նաև Կանադայի Պահպանողական կուսակցության անդամ և Կանադա-Հայաստան խորհրդարանական բարեկամության խմբակցության նախագահ Հարոլդ Ալբրեխտի, Ազատական կուսակցության նախկին ղեկավար Ստեֆան Դիոնի, Պահպանողական կուսակցության անդամ Փոլ Գալանտրայի և «Բլոք Քվեբեքուա» /Bloc Quebecois/ կուսակցության ղեկավար Ժիլ Դյուսեփի հետ: Կանադայի վերոնշյալ պաշտոնատար անձանց հետ հանդիպումների ժամանակ Պետրոսյանը անդրադարձել է Կովկասյան տարածաշրջանում առկա իրավիճակին` միջազգային ասպարեզում տիրող քաղաքական վերջին իրադարձությունների լույսի ներքո:

ԼՂՀ արտաքին գերատեսչության ղեկավարը անդրադարձ է կատարել նաև վերջին տարիներին Ադրբեջանի աննախադեպ սպառազինման երևույթի վրա` շեշտելով, որ դա կարող է բացասական ազդեցություն ունենալ քաղաքական ներկա իրավիճակի վրա և ապակայունացնել ամբողջ տարածաշրջանը: Գեորգի Պետրոսյանը հաստատել է նաև, որ վերջին ժամանակներս Ադրբեջանը սաստկացրել է հակահայկական քարոզչությունը, հատկապես` տեղեկատվական ոլորտում:

Հարավային Օնտարիոյի Քեմբրիջ քաղաքի քաղաքապետ Դագ Քրեյգի հետ հանդիպման ժամանակ բարձրացվել է Ստեփանակերտն ու Քեմբրիջը քույր քաղաքներ հռչակելու հնարավորության հարցը:

Քաղաքական հանդիպումների ընթացքում նախարար Պետրոսյանին ուղեկցում էին Կանադայի Հայ դատի հանձնախմբի ներկայացուցիչները:

Փետրվարի 24-ին ԼՂՀ արտաքին գերատեսչության ղեկավարը Կանադայից կմեկնի Միացյալ Նահանգներ: