Ռուսաստանն ու Թուրքիան ապրիլին կհրաժարվեն վիզաներից

Ռուսաստանի և Թուրքիայի քաղաքացիները կկարողանան փոխադարձ այցելություններ կատարել և սահմանը  հատել առանց վիզայի արդեն ընթացիկ տարվա ապրիլից:

Ինչպես հաղորդում են թուրքական ԶԼՄ-ները, համաձայնագրի ստորագրման առնչությամբ կառավարական մակարդակի գործընթացներն արդեն ավարտված են:  Թուրքիայի վարչապետ Ռեջեփ Թայիփ Էրդողանի` Մոսկվա կատարելիք այցի ընթացքում  կողմերը համապատասխան համաձայնագրեր կփոխանակեն, որից հետո վիզային ռեժիմի դադարեցման գործընթացը ուժի մեջ կմտնի:

Հիշեցնենք, որ մուտքի արտոնագրի վերացման մասին համաձայնագիրը ստորագրվել էր 2010թ. մայիսի 12-ին, սակայն փաստաթուղթի` ուժի մեջ մտնելու համար անհրաժեշտ էր մի շարք հարցեր լուծել:

Ակնկալվում է, որ վիզային ռեժիմի վերացումը կնպաստի ռուսաստանյան զբոսաշրջիկների ավելացմանը Թուրքիայում:

Նշենք, որ 2010 թվականին Թուրքիայում հանգստացել է ավելի քան 3 մլն ռուսաստանցի զբոսաշրջիկ: