Epress.am Լուրեր Հայաստանից
ԱՄՆ Պետդեպի խոսնակ Ֆիլիպ Քրոուլին հրաժարական է տվել WikiLeaks կայքին կառավարական գաղտնի փաստաթղթեր փոխանցելու մեջ մեղադրվող շարքային Բրեդլի Մենինգի` կալանավայրում պահպանման պայմանների վերաբերյալ քննադատական արտահայտություններ անելու համար:
ԱՄՆ պետքարտուղար Հիլարի Քլինթոնը մարտի 14-ին ստորագրել է Քրոուլիի հրաժարականի դիմումը` նշելով, որ «ցավոք սրտի» ստիպված է եղել նման որոշում կայացնել:
WikiLeaks կայքի ենթադրյալ տեղեկատուն 2011 թվականի մարտին ԱՄՆ զինված ուժերին պաշտոնապես նամակ է ուղարկել, որում բողոքում է Վիրջինիա նահանգում գտնվող իր կալանավայրի պայմաններից: Նշենք, որ կալանավայրում նա գտնվում է 2010 թվականի հուլիսից:
Մենինգի կալանավայրի պայմանների մասին հարցը տրվել է Քրոուլիին Մասաչուսեթսի տեխնոլոգիական ինստիտուտում: Պետդեպարտամենտի խոսնակը ԱՄՆ պաշտպանության նախարարության գործողությունները «ծիծաղելի, անարդյունավետ և հիմար» է անվանել, միաժամանակ հավելելով, որ կասկածի տակ չի դնում նրան կալանքի տակ պահելու անհրաժեշտությունը:
Ավելի ուշ Քրոուլին պարզաբանել է, որ խիստ սուբյեկտիվ կարծիք է հայտնել: Հրաժարականի մասին դիմումի մեջ, որը ներկայացվել է Պետդեպին ելույթից մի քանի օր հետո, Քրոուլին հաղորդել է, որ «գիտակցում է իր արտահայտությունների հետևանքները և պատասխանատվություն է կրում իր կողմից արված քննադատությունների համար»: