Հոլիվուդյան դերասանին վկա են կանչել Բերլուսկոնիի սեքսուալ սկանդալի գործով

Իտալիայի վարչապետ Սիլվիո Բերլուսկոնիի փաստաբանները խնդրել են հայտնի դերասան Ջորջ Քլունիին անչափահաս մարմնավաճառուհու հետ սեռական կապերի մեջ մեղադրվող վարչապետի գործով որպես վկա հանդես գալ, հաղորդում է AFP-ն:

Բերլուսկոնիի պաշտպանների համաձայն` Քլունին և նրա ընկերուհին` իտալացի մոդել Էլիզաբեթ Կանալիսը, միասին մասնակցել են Բերլուսկոնիի կազմակերպած երեկույթներին, որոնց ժամանակ, հետաքննության պնդմամբ, 74-ամյա քաղաքական գործիչը խրախճանքներ էր կազմակերպում մարմնավաճառուհիների մասնակցությամբ: Երեկույթներին Քլունիի և նրա ընկերուհու մասնակցության մասին հայտարարել է մարոկուհի Քարիմա էլ Մարուգը, ով մեղադրող կողմի հիմնական վկան է:

Ինքը`Քլունին, հայտարարել է, որ իրեն տարօրինակ է թվում վարչապետի փաստաբանների որոշումը: Դերասանը հայտարարել է, որ Բերլուսկոնիի հետ հանդիպել է ընդամենը մեկ անգամ, և հանդիպման նպատակը Դարֆուրի բնակչությանն օգնություն ցուցաբերելու հարցերի քննարկումն է եղել:

Փետրվարին Իտալիայի դատարանը վարչապետ Սիլվիո Բերլուսկոնիին քրեական  պատասխանատվության ենթարկելու մասին որոշում էր կայացրել: Վարչապետը մեղադրվում է անչափահաս աղջիկների հետ սեռական կապեր ունենալու և պաշտոնական դիրքը չարաշահելու մեջ:

Հիշեցնենք, որ հարյուր հազարավոր իտալուհիներ փետրվարի 13-ին բողոքի ցույց էին անցկացրել` պահանջելով, որ կանանց նկատմամբ իր թուլությունը թաքցնել չկարողացող 74-ամյա վարչապետը հրաժարական տա: Բողոքի ակցիայի մասնակիցների կարծիքով` վարչապետի պահվածքը վիրավորում է կանանց արժանապատվությունը: