Օգյուն Սամաստը պատմել է Դինքի սպանության մեղավորների մասին

Թուրքահայ լրագրող, «Ակօս» շաբաթաթերթի գլխավոր խմբագիր Հրանտ Դինքի սպանության մեջ մեղադրվող Օգյուն Սամաստը հայտարարել է, որ ինքը մեղավոր չէ, «մեղավոր են նրանք, ում թերթերի վերնագրերը փաստում էին Դինքի դավաճան լինելը»: Այս մասին տեղեկացնում է Today’s Zaman-ը:

Մեղադրյալն իր հայտարարությունը նամակով երկուշաբթի ուղարկել է Ստամբուլի դեռահասների դատարան. «Ես մեղավոր չեմ: Մեղավոր են նրանք, ում թերթերի վերնագրերը Դինքին դավաճան էին անվանում: Աչքերս արդեն բացվել են: Հիմա էլ թող նրանք մտածեն, ովքեր պատրաստում էին այդ վերնագրերը: Ո՞ւր են նրանք, ովքեր ինձ այստեղ են բերել: Ես չգիտեի «Ակօսի» մասին: Իմ երակները լցված էին անտարբերությամբ: Ես իմացա Դինքի մասին թերթերից: Եվ ես զոհաբերեցի ինքս ինձ… Ես վախենում եմ Յասին Հայալից»,-ասված է նամակում:

Նշենք, որ Դինքի սպանության գործով Հայալը կասկածյալների թվում է որպես պատվիրատու:

Սամաստը նաև հայտարարել, որ ինքը սկզբում պատրաստվում էր բռունցքով հարվածել Դինքի դեմքին, երբ առաջին անգամ հանդիպեց նրան «Ակօսի» դիմաց: «Ես նրան երկու անգամ կհարվածեի, պարզապես շփոթվեցի: Նրանք ինձ զոհաբերեցին»,- նշում է Սամաստը:

Հրանտ Դինքը սպանվել է 2007 թվականի հունվարի 19-ին «Ակօս» թերթի խմբագրության շենքի մոտ: Սպանության պահին Օգյուն Սամաստը 17 տարեկան էր: