Բանաձևը կոչ է անում արգելել հայաստանցի որոշ պաշտոնյաների մուտքը Եվրամիություն

Մայիսի 20-21-ին Եվրոպայի լիբերալ դեմոկրատական կուսակցությունը Դրեզդենում ընթացող  խորհրդի նիստի ժամանակ ընդունել է մի բանաձև, որը վերաբերում է Հայաստանի ներքաղաքական զարգացումներին, Մարտի 1-ի հետևանքների վերացմանը և հնարավոր պատժամիջոցներին: Բանաձևը ներկայցրել է Հայոց Համազգային Շարժումը:

Բանաձևի պահանջներն այսօր ասուլիսին ներկայացրել է ՀՀՇ վարչության նախագահ Արամ Մանուկյանը:

«Պահանջում ենք Հայաստանի իշխանություններից անհապաղ և անվերապահորեն ազատ արձակել բոլոր քաղաքական բանտարկյալներին: Կոչ ենք անում Եվրոպական խորհրդարանում Լիբերալների և դեմոկրատների ալյանսին (ALDE) բարձրացնել Եվրոմիություն մուտքի արտոնագրի արգելման հարցը հայկական այն պաշտոնյաների համար, ովքեր ներգրավված են եղել քաղաքական շարժառիթներով իրականացվող արդարադատության համակարգի չարաշահմանը:

Կոչ ենք անում  ALDE –ին պնդել, որպեսզի ԵՄ-Հայաստան երկխոսության ընթացքում սույն խնդիրը դիտարկվի որպես առաջնահերթություն: Կոչ ենք անում ԵԼԴԲԿ անդամ կուսակցություններին սույն  հարցը բարձրացնել որպես առաջնահերթություն իրենց երկրների և Հայաստանի խորհրդարանների համագործակցության շրջանակներում: ԵԼԴԲԿ քարտուղարությանը հանձնարարվում է զեկուցել սույն հարցի շուրջ ԵԼԴԲԿ հաջորդ Կոնգրեսի ընթացքում»,- ասված է  բանաձևում:

Արամ Մանուկյանը նաև տեղեկացրել է, որ այս բանձևն ընդունվել է 57 լիբերալ կուսակցությունների 100-ից ավելի պատվիրակների կողմից:

Ի դեպ, Մանուկյանի խոսքով, նախնական համաձայնություն կա, որ հաջորդ նիստը կայանալու է Երևանում: