Epress.am Լուրեր Հայաստանից
Միջքաղաքային հասարակական տրանսպորտի վարորդները Երևանում առայժմ շարունակում են կանգ առնել «Ռոսիա» առևտրի կենտրոնի ետնամասում, սակայն ամեն օր սպասում են ղեկավարության հրամանին: Այս մասին Epress.am-ի հետ զրույցում ասել է Մասիս-Երևան երթուղայինի վարորդներից մեկը:
«Ասում են, որ քաղաքում խցանումներից խուսափելու համար պիտի մարշրուտկեքը կանգնեն կայարանում: Դե էս մի երեք տարի ա՝ տենց խոսակցություն կա»,- ասել է նա:
Արտաշատ-Երևան երթուղին իրականացնող վարորդներից և ոչ մեկը չցանկացավ պատասխանել մեր այն հարցին, թե արդյոք կանգառը տեղափոխելու մասին լուրերը համապատասխանում են իրականությանը:
«Բոլոր հարցերով դիմեք ղեկավարությանը»,- կրկնում էին նրանք:
Այսօր առավոտյան Epress.am-ի հետ զրույցում Արտաշատից եկող ուղևորներից մեկը պատմել էր, որ վաղվանից իրենց կանգառը տեղափոխվելու է Երևանի «Գործարանային» կամ «Սասունցի Դավիթ» մետրոյի կայարանների հարակից տարածք, իսկ վարորդը ուղևորներին բացատրել էր, որ նման քայլը միտված է մետրոյից օգտվողների թիվն ավելացնելուն:
Epress.am-ը փորձել է հարցի առնչությամբ պարզաբանումներ ստանալ Երևանի քաղաքապետարանից, սակայն Հասարակայնության հետ կապերի բաժնից մեզ տեղեկացրեցին, որ միջքաղաքային տրանսպորտի հարցով զբաղվում է ՀՀ Կապի և տրանսպորտի նախարարությունը:
«Երբ կապի և տրանսպորտի նախարարությունը լիցենզիա է տրամադրում այս կամ այն երթուղին իրականացնողին, սահմանվում են նաև նրա՝ պայմանականորեն Ա և Բ կետերը: Եվ եթե այդ հարցում փոփոխություններ են տեղի ունենում, դրանք համաձայնեցվում են քաղաքապետարանի հետ»,- ասել է Քաղաքապետարանի ներկայացուցիչը:
Կապի և տրանսպորտի նախարարությունում, սակայն, ասացին, որ միջքաղաքային երթուղայինների երևանյան կանգառը որոշում Երևանի քաղաքապետարանը: