ՀՀ կառավարությունը գումար հատկացրեց Եհովայի վկային փոխհատուցում վճարելու համար

Այսօր ՀՀ կառավարության որոշմամբ Մարդու իրավունքների եվրոպական դատարանի (ՄԻԵԴ) Մեծ Պալատի կողմից «Բայաթյանն ընդդեմ Հայաստանի» գանգատով կայացված վճռի պահանջները կատարելու նպատակով ՀՀ արդարադատության նախարարությանը հատկացվել է 20 հազար եվրոյին համարժեք դրամ:

Այդ գումարի կեսը տրվելուն է Վահան Բայաթյանին իբրև ոչ նյութական վնասի փոխհատուցումը, մնացածը որպես դատական ծախսի փոխհատուցում։

Հիշեցնենք, որ «Եհովայի վկաներ» կրոնական կազմակերպության ներկայացուցիչ Վահան Բայաթյանը 2002 թվականին դատապարտվել էր երկուսուկես տարվա ազատազրկման զենք կրելուց և զինծառայությունից հրաժարվելու պատճառով: Բայաթյանը հրաժարվել էր բանակ գնալ կրոնական դրդապատճառներից ելնելով:

2011 թվականի հուլիսի 7-ին ՄԻԵԴ–ի Մեծ պալատը ձայների մեծամասնությամբ (16 կողմ, 1 դեմ) վճիռ էր կայացրել, համաձայն որի Հայաստանը խախտել է Եհովայի վկա Վահան Բայաթյանի խղճի ազատության իրավունքը` պարտավորեցնելով Հայաստանի Հանրապետությանը վճարել 20,000 եվրո փոխհատուցում: