Ռուբեն Հայրապետյանի օբյեկտում հնչած կրակոցների առնչությամբ քրեական գործ է հարուցվել

Հայաստանի գլխավոր դատախազ Աղվան Հովսեփյանի ցուցումով այսօր քրեական գործ է հարուցվել օգոստոսի 14-ի լույս 15-ի գիշերը «Հարսնաքար» ռեստորանային համալիրում ծագած վիճաբանության առնչությամբ: Այս մասին «Ազատություն» ռադիոկայանին հայտնեցին Գլխավոր դատախազի մամուլի ծառայությունից:

Օգոստոսի 14–ի լույս 15-ի գիշերը «Հարսնաքար» ռեստորանային համալիրում հնչած կրակոցների հետևանքով 2 հոգի տեղափոխվել էր հիվանդանոց: Մամուլում հրապարակումներ կային այն մասին, որ ռեստորանային համալիրում անցկացվող հարսանեկան խնջույքի ժամանակ վեճ է ծագել, որին միջամտել է ԱԺ պատգամավոր Ռուբեն Հայրապետյանի թիկնապահը՝ Եզդի Աշոտ մականունով: Թերթերը գրում էին, որ նա կրակել և վիրավորել է երկու հոգու, որոնցից մեկը` 33-ամյա Նորիկ Աթոյանը, Սերժ Սարգսյանի եղբայր Սաշիկ Սարգսյանի թիկնապահներից է:

Այսօր ավելի վաղ լրագրողների հետ հանդիպմանը Աղվան Հովսեփյանը հայտարարել էր, որ ինքը միջադեպի մասին տեղեկացել է մամուլից և հանձնարարել է ստուգել` արդյո՞ք քրեական գործ հարուցված է, թե ոչ:

«Բոլոր դեպքերում, եթե ինչ-որ դեպք է տեղի ունենում. հանցագործության դեպք, դրան նախորդում են որոշակի ստուգումներ», – պատասխանելով «Ազատություն» ռադիոկայանի հարցին, թե ինչո՞ւ մինչև հիմա գործ հարուցված չէ, ասել էր Գլխավոր դատախազը:

Դիտարկմանը, թե արդյո՞ք քրեական գործի բացակայությունը կապված չէ այն հանգամանքի հետ, որ կրակոցները հնչել են Ազգային ժողովի պատգամավոր, գործարար Ռուբեն Հայրապետյանին պատկանող ռեստորանում, Աղվան Հովսեփյանը միայն արձագանքել էր, թե հանձնարարել է, որ ստուգեն: