Արաբ բլոգերները կարող են արժանանալ Խաղաղության նոբելյան մրցանակի

2011 թվականի Խաղաղության նոբելյան մրցանակի հավակնորդների թվում կարող են հայտնվել այն բլոգերները, որոնք սոցիալական կայքերի միջոցով ընթացիկ տարվա գարնանը հեղափոխական շարժումներ էին կազմակերպում Մերձավոր Արևելքի և Աֆրիկայի մահմեդական երկրներում:

Նման առաջարկով է հանդես եկել Նորվեգիայի նախկին արտգործնախարար Յան Էգելանդը: Նրա խոսքով` նման կերպ կազմկոմիտեի ղեկավարությունը ցանկանում է արձագանքել խոշոր միջազգային իրադարձությանը: Այս տրամաբանությունից ելնելով` Նոբելյան կոմիտեն կարող է մրցանակ շնորհել Եգիպտոսում Google որոնողական կայքի մենեջեր Վաել Գոնիմին, ով համարվում է եգիպտական հեղափոխության գլխավոր կազմակերպիչներից մեկը: Մրցանակի հավակնորդների մեջ կարող է լինել նաև թունիսցի բլոգեր Լինա Բեն Մեննին, հաղորդում է Reuters գործակալությունը:

«Իր կարևորությամբ և բեկումնայնությամբ ոչ մի իրադարձություն չի կարող մոտենալ այս գարնանը արաբական երկրներում տեղի ունեցած դեպքերին»,- նշել է Էգելանդը:

Մրցանակի հաղթողների անունները կհրապարակվեն հոկտեմբերի 7-ին Օսլոյում: Խաղաղության մրցանակի հավակնորդների թվում են նաև Wikileaks սկանդալային կայքի հիմնադիր Ջուլիան Ասանժը, Գերմանիայի նախկին կանցլեր Հելմուտ Քոլը: