BMW-ի հայազգի աշխատակիցներին կդատեն մեքենա «փախցնելու» համար

BMW ընկերության Խաղաղօվկիանոսյան տարածաշրջանի ներկայացուցչության հայազգի աշխատակիցները դատարանի առջև կկանգնեն, գրում է Glendale News Press պարբերական:

21-ամյա Վաչե Մարկոսյանը և 22-ամյա Արթին Յազիչյանը ընկերության ավտոսրահից անձնական նպատակներով սպորտային մեքենա են «փախցրել» ու սլացել Գլենդեյլի փողոցներով:

Ղեկին գտնվող Մարկոսյանի կողքին նստած Յազիչյանը որոշել է տեսագրել իրենց «արկածախնդրությունը», իսկ հաջորդ օրը տեսանյութը հայտնվել է Youtube կայքում:

Գլեյնեդլի ոստիկանության ներկայացուցիչները պարզել են, որ դեպքը տեղի է ունեցել օգոստոսի 12-ին, սակայն Youtube-ում տեղադրված տեսանյութի մասին ոստիկանությանը հայտնի է դարձել սեպտեմբերի 14-ին միայն:

«Փաստորեն, նախկան մեր տեղեկանալը տեսանյութը երկար ժամանակ եղել է համացանցում», – ասել է Գլենդեյլի ոստիկանության սերժանտ Թոմ Լորենսը:

Նշենք, որ արկածախնդիր երիտասարդներն անմիջապես ազատվել են աշխատանքից: