Ամուսնու կողմից սպանված Զարուհի Պետրոսյանի երեխան սկեսրոջ մոտ է, բայց ՀԿ-ները շարունակում են անհանգստանալ

Ամուսնու ծեծի հետևանքով  հիվանդանոցում մահացած  20-ամյա Զարուհի Պետրոսյանի դուստրը՝  Լիլիա Սարկիսովան, ով մոր մահվանից հետո գտնվում էր Նորքի «Մանկան տանը», տեղափոխվել է տուն: Այժմ նա բնակվում է տատիկի ու պապիկի  հետ՝ Աջափնյակ  վարչական շրջանի բնակարանում: Հաճախում է  նույն վարչական շրջանի թիվ 36 մանկապարտեզ ու համարվում է լավագույն սաներից մեկը: Այս մասին Epress.am-ի հետ զրույցում պատմել է Նորք-Մարաշ վարչական շրջանի ղեկավարի աշխատակազմի կրթության, մշակույթի, սպորտի բաժնի պետ «Խնամակալության ու հոգաբարձության»  հանձնաժողովի քարտուղար Հայկուհի Քյուփելյանը:

«Մասիսի քաղաքապետարանի որոշմամբ` դեպքից հետո Լիլիան տեղափոխվել էր Երևանի «Մանկան տուն»: Տատիկը` Լիլիա Սարկիսովան, հաճախ  էր գնում փոքրիկին տեսակցության ու նաև ցանկություն էր հայտնել ստանձնել թոռնուհու խնամակալությունը: Երեխայի հայրը՝  Յանիս Սարկիսովը, կալանավայրից լիազորագիր էր ուղարկել՝  իրավասու մարմինների կնիքով, ըստ որի տատիկը պետք է ճանաչեր երեխայի հայրությունն ու դառնար նրա խնամակալը», – նշել է Հայկուհի Քյուփելյանը:

Նրա խոսքով՝  այդ  ընթացքում Զարուհի Պետրոսյանի իրավահաջորդ ճանաչված Հասմիկ Պետրոսյանը պատրաստվում էր խնամակալության վերցնել քրոջ դստերը:

«Պահանջված կարգի համաձայն` մենք դիմեցինք Մասիսի քաղաքապետարան, որպեսզի նրանք համապատասխան ուսումնասիրություններ իրականացնեն Լիլիա Սարկիսովայի բնակարանում ու ներկայացնեն համապատասխան եզրակացություն՝ համաձան որի տանը պետք է բավարար պայմաններ լինեն՝ փոքրիկին տեղափոխելու համար: Երկուստեք  ուսումնասիրվեցին թե տատիկի, թե մորաքրոջ բնակարանները: Պարզվեց, որ տատիկի` Մասիս քաղաքում գտնվող տան պայմանները բավարար չեն, իսկ  մորաքույրը հղի է և ամուսնու ընտանիքի հետ վարձակալությամբ բնակվում է Աբովյան քաղաքում: Որոշ ժամանակ անց տատիկը՝  Լիլիա Սարկիսովան, դիմում է ներկայացնում, ըստ որի ինքն ու իր ամուսինը  երեխային տեղափոխելու են Աջափնյակ վարչական շրջանի Նազարբեկյան փողոցում գտնվող իրենց բնակարանը»,- պատմել է Հայկուհի Քյուփելյանը:

Նշանակված ուսումնասիրությունների արդյունքում պարզվել է, որ բնակարանային պայմանները նորմալ են, և երեխային կարող են տեղափոխել տուն:

«Մենք ոչ մի հիմք չունեինք տատիկին կասկածելու, պահանջեցինք բոլոր փաստաթղթերը, համոզվեցինք, որ ամեն ինչ կարգին է, և հաստատեցինք խնամակալությունը: Հուլիսից  երեխան ապրում է տատիկի ու պապիկի հետ, հաճախում է մանկապարտեզ: Ամիսը մեկ անգամ  պարտադիր կերպով զանգ եմ տալիս թիվ 36 մանկապարտեզի տնօրեն Անահիտ Հայրապետյանին, տեղեկանում երեխայի մասին: Տնօրենի հավաստմամբ` Լիլիան շատ խնամված և կոկիկ  է հագնվում, ընդունակ է ու խելացի երեխա է: Վերջերս հեռախոսազրույց եմ ունեցել նաև մանկապարտեզի բուժքույր Անահիտ Հարությունյանի հետ, ով նշեց, որ փոքրիկ Լիլիան գտնվում է ամբողջ կոլեկտիվի ուշադրության կենտրոնում», – նշել է Հայկուհի Քյուփելյանը:

Նրա խոսքով` երեխայի ճակատագրով պարբերաբար հետաքրքրվում են մի շարք ՀԿ-ներ:

Հիշեցնենք, որ 2010 թ. հոկտեմբերի 1-ին 20-ամյա Զարուհի Պետրոսյանը մահացել է ամուսնու պարբերական դաժան ծեծի հետևանքով: Ամուսինը` Յանիս Սարկիսովը, դատապարտվել է 10 տարվա ազատազրկման

Զարուհի Պետրոսյանի հարազատների պնդմամբ` հանցագործությանը մասնակից էր նաև Զարուհու սկեսուրը: Դատարանը, սակայն, նրան մեղադրելու համար բավարար հիմքեր չգտավ: