Ստամբուլում անցորդների վրա կրակած տղամարդուն սպանել են

Ստամբուլի կենտրոնում` Սուլթանահմեդ հրապարակում, անցորդների վրա կրակած հանցագործը սպանվել է ոստիկանական ուժերի կողմից, հաղորդում է hurriyetdailynews.com-ը:

Միջադեպի վկաները հայտնում են, որ հանցագործը զենքով սպառնացել է ծառայության մեջ գտնվող զինվորին և խլել նրանից G3 զինվորական հրացանը:

Պարբերականի տեղեկությունների համաձայն` հանցագործը սիրիացի է:

Նրա գործողությունների հետևանքով զինվորը և մեկ զբոսաշրջիկ վիրավորվել են:

Անվտանգության ուժերը այս պահին շրջափակել են հրապարակը և հեռացրել այնտեղից անցորդներին: Սակայն, ինչպես նշում է պարբերականը, բախումները դեռևս շարունակվում են Թոփկապի պալատի ներսում: Ենթադրվում է, որ հանցագործը հանցակիցներ ունի:

Ստամբուլի նահանգապետ Հուսեյն Ավնի Մութլուն պարբերականի թղթակցի հետ զրույցում ընդգծել է, որ հանցագործի գործողությունների դրդապատճառը  բացառապես անձնական  բնույթի է և կտրականապես մերժել է որևէ տեղեկություն հաղորդել նրա ազգային պատկանելության վերաբերյալ:

CNN Turk հեռուստաալիքը հրապարակել է հանցագործի նկարը: