Նիկոյանը նորմալ ԱԺ նախագահ է, իսկ «հայվանը» թուրքերեն անասուն է. բացատրել է ՀՀԿ փոխնախագահը

Սամվել Նիկոյանը նորմալ թեկնածու է ԱԺ նախագահի պաշտոնի համար: Այս մասին այսօր լրագրողների հետ հանդիպման ժամանակ հայտարարել է Հանրապետական կուսակցության փոխնախագահ Ռազմիկ Զոհրաբյանը` անդրադառնալով երեկ Հանրապետական կուսակցության խորհրդի նիստում կայացրած որոշմանը, համաձայն որի ԱԺ նախագահի պաշտոնակատար Սամվել Նիկոյանը կզբաղեցնի ԱԺ նախագահի պաշտոնը:

Լրագրողներն ասել են բանախոսին, որ Նիկոյանը ձախողել է իր աշխատանքը որպես «Մարտի 1-ի» հանձնաժողովի նախագահ, սակայն Զոհրաբյանը նշել է, որ վերոնշյալ հանձնաժողովը ժամանակավոր էր, և Նիկոյանը արել է հնարավոր ամեն բան մարտի 1-ի սպանությունները բացահայտելու համար (2008 թվականի մարտի 1-ից հետո 10 մարդկանց սպանությունները չեն բացահայտել- խմբ.):

Ռազմիկ Զոհրաբյանն անդրադարձել է նաև այն լուրերին, որ ՀՀ ԱԺ նախկին նախագահ Հովիկ Աբրահամյանն իրականում դժգոհ է եղել պաշտոնը լքելու կապակցությամբ, սակայն պատգամավորը հավաստիացրել է ներկաներին, որ ինքը հանդիպել է Հովիկ Աբրահամյանի հետ պաշտոնը լքելուց հետո և նման տրամադրություններ չի նկատել:

Զոհրաբյանը նշել է, որ, զբաղեցնելով ՀՀԿ նախընտրական շտաբի պետի պաշտոնը, Աբրահամյանը ցանկանում է ապացուցել, որ Հայաստանում հնարավոր է լավ ընտրություններ անցկացնել:

Անդրադառնալով ԱԺ-ում երկու օր առաջ տեղի ունեցած միջադեպին, երբ ՀՀԿ-ական պատգամավոր Առաքել Մովսիսյանը «Ժառանգության» պատգամավոր Արմեն Մարտիրոսյանին «հայվան» և «էշ» էր անվանել, Զոհրաբյանը նախ ասել է, որ «թուրքերեն հայվան բառը նշանակում է անասուն, էշն էլ նույն անասունն է», որից հետո հայտարարել, որ «բոլոր պառլամենտներում նման էկզոտիկ միջադեպեր լինում են, պարզապես պետք է ավելի զուսպ լինել»: