Բանդիտիզմ. հայկական հանցավոր խմբավորման անդամներին դատապարտեցին Ռուսաստանում

Մերձմոսկովյան դատարանը տարբեր ժամկետներով ազատազրկման է դատապարտել մեծամասամբ հայերից բաղկացած հանցավոր խմբավորման անդամներին, որոնք զբաղվում էին մարդկանց առևանգմամբ և դրամաշորթությամբ:

Հանցավոր խմբավորման մեջ էին մտնում նաև գործող ՕՄՕՆ-ականներ: Այս մասին «Ռիա Նովոստիին» հայտնել է ՌԴ Հետաքննչական կոմիտեի պաշտոնական ներկայացուցիչ Վլադիմիր Մարկինը:

Նրա խոսքով` 2009 թվականին մայրաքաղաքային գործարար Արմեն Եփրեմյանն իր ծանոթներից մեկի` ՌԴ Ներքին Գործերի նախարարության նախկին աշխատակից Ալեքսեյ Կարմանովի հետ 9 հոգուց բաղկացած հանցավոր խմբավորում է ստեղծել:

Խմբավորման մաս են կազմել նաև այդ պահին գործող ՆԳՆ ՕՄՕՆ-ի աշխատակիցներ: Խմբավորման տրամադրության տակ կային նաև Կալաշնիկով հրացաններ, խլացուցիչ ատրճանակներ, ինչպես նաև նռնակներ ու ականներ:

Խմբավորման առաջին զոհն է դարձել ապակու գործարանի գլխավոր տնօրեն Հրաչիկ Արոյանը: Մեղադրյալները ցանկանում էին նրա համար 20 հազար դոլար ստանալ: Բայց գործարարը  այդպիսի գումար չի ունեցել և նրան ազատ են արձակել:

Արոյանի հարազատներն միաժամանակ հասցրել են օգնություն խնդրել քրեական հեղինակություն Հակոբ Մելիքսեթյանից: Նա գտել է Եփրեմյանին, սակայն, գնահատելով նրա քրեական տաղանդը, առաջարկել է մեկ այլ հանցագործություն կազմակերպել` Սոչիի հյուրանոցային ցանցի սեփականատիրոջ` Յուրիկ Աբրահամյանի եղբոր առևանգումը:

«2009 թվականի սեպտեմբերին զինված ՕՄՕՆ-ականները ներխուժել են Աբրահամյանի տուն, կապկպելով տանը գտնվող հարազատներին, գողացել են թանկարժեք իրեր և զենք: Անձամբ տուժածին ՕՄՕՆ-ականները մեքենայով տեղափոխել են մեկ այլ վայր, որտեղ մոտ մեկ ամիս պահել են անազատության մեջ` եղբորից 6 միլիոն դոլարի փրկագին պահանջելով»,-հաղորդել է Մարկինը:

Մեղադրյալներին այդպես էլ չի հաջողվել ստանալ փրկագինը, ոստիկանները հասցրել են  հանցագործների հետքին ընկնել: 2009-ի հոկտեմբերին տուժածին ազատել են:

Խմբավորման անդամները մեղավոր են ճանաչվել ՌԴ քրեական օրենսգրքի միանգամից մի քանի հոդվածներով: Դատարանի վճռի համաձայն` Մելիքսեթյանը 17 տարվա ազատազրկման է դատապարտվել, Կոնստանտին Դոզորովը`15, Սերգեյ Կոտովը`14, Սերգեյ Օտրակովսկին` 11, Սամվել Վոսկանյանն ու Ալեքսեյ Կարմանովը`10, Անդրեյ Դեմիդենկովը` 9: