Աշոտյանը դպրոցների վատթար վիճակը տարեվերջյան ասուլիսի թեմա չի համարում

Երևանցի աշակերտները, որոնք մինչ այսօր դիմացել են վատթար պայմաններին, պետք է շարունակեն դիմանալ դպրոցի անմխիթար վիճակին, կարծում է ՀՀ Կրթության և գիտության նախարար Արմեն Աշոտյանը:

Մեկնաբանելով, մասնավորապես, մի շարք դպրոցներում սանհանգույցների ծայրաստիճան վատթար վիճակի և դրանցից օգտվելու հնարավորություն չունեցող աշակերտների ու ուսուցչական կոլեկտիվի մասին հարցը, Աշոտյանն ասել է.

«Այսքան տարի ի՞նչ են արել այդ աշակերտները, դիմացել են ու գնացել են դասի»:

Հարցին՝ երեխաները զուգարան չգնա՞ն, նախարարը պատասխանել է:

«Մինչև այսօր չե՞ն գնացել: Եվ երկրորդը՝ չեմ կարծում, որ դա տարեվերջյան ասուլիսի հարցադրում է», – ասել է Աշոտյանը` ասուլիսի ժամանակ շեշտը դնելով ԿԳՆ-ի 2011 թվականի ձեռքբերումների և հաջողությունների վրա:

«Հարյուր քսանհինգ համայնքներում ստեղծվել են նախակրթարաններ, շուրջ 1700 երեխա այս տարվա սեպտեմբերի մեկից հաճախել է մանկապարտեզներ, նախակրթարաններ և ստացել  նախադպրոցական կրթություն, հաստատվել է նախակրթական նոր չափորոշիչը: Տարին բուռն է եղել նաև հանրակրթական դպրոցի համար, հաստատվել է հանրակրթության պետական չափորոշիչը, որով պայամանավորվում է մեր կրթության բովանդակությունը և որից բխում են ուսումնական ծրագրերը, դասագրքերը և մեթոդաբանությունը», -պատմել է նախարարը:

2011 թվականի ամենամեծ բարեփոխումներից նա  համարել է դպրոցի տնօրենների հավաստագրման գործընթացը:

«Այդ քննությունները կազմակերպվել են երեք փուլով, և նշեմ, որ վայելել են հասարակության վստահությունը: Շուրջ  ութ հազար  ուսուցիչ անցել է լայնածավալ վերապատրաստում», – ասել է նա:

Աշոտյանը տեղեկացրել է նաև, որ ակտիվ ընթանում է նաև դպրոցաշինությունը ինչպես «Լինսի» հիմնադրամի, այնպես էլ պետական բյուջեի միջոցներով:

«Ինը ավագ դպրոցներ ներգրավված են եղել այդ ծրագրում՝  ինչպես Երևանում , այնպես էլ մարզերում: Շուրջ մեկ միլիարդ երկու հարյուր միլիոն դրամ  հատկացվել է  ինը ավագ դպրոցների  վերակառուցման ծրագրին», – նշել է նախարարը:

Աշոտյանը կարևորել է  նաև  տասներկուամյա կրթակարգին անցնելու  ծրագիրը:

Նրա խոսքով` նորագույն համակարգիչներով են հագեցել մի շարք դպրոցներ, նաև կարևոր բաղկացուցիչ մաս  է դարձել շախմատի ներդրումը դպրոցում:

Խոսելով բարձրագույն կրթության մասին՝ նախարարը նշել է, որ այս տարվա ընթացքում պակասել է մասնավոր բուհերի և  բուհերի ֆակուլտետների թիվը:

«Մանավոր բուհերի մի մասն էլ գտնվում է խոշորացման գործընթացում»:

Ստեղծվել է նաև բուհերի ու ավագ դպրոցների համագործակցության ծրագիր:

Աշոտյանը  հիշեցրել է, որ Հայաստանում ուսանելու են եկել հարյուր իննսուն արտասահմանցի ուսանողներ՝ չհաշված Վրաստանից ու Ռուսաստանից  ժամանած քաղաքացիներին, որոնց հետ ընդհանուր թիվը կկազմի շուրջ ութ հարյուր: