Սարկոզիին խորհուրդ են տվել ցեղասպանության մասին հարցնել հորը, «նա պատմելու բան ունի»

Թուրքիայի վարչապետ Ռեջեփ Թայիփ Էրդողանը  ֆրանսիացի պատգամավորների կողմից Հայոց Ցեղասպանության ժխտումը քրեականացնելու մասին օրինագծի ընդունմանն ի պատասխան մեղադրել է Ֆրանսիացիներին ալժիրցիների ցեղասպանության մեջ: Այս մասին վարչապետը հայտարարել է այսօր մամուլի ասուլիսին, հաղորդում է Agence France-Presse-ը:

Էրդողանը հայտարարել է, որ 1945-ից սկսած Ֆրանսիան պատասխանատու է Ալժիրի բնակչության 15 տոկոսի ոչնչացման համար: «Դա ցեղասպանություն է»,-պարզաբանել է թուրք վարչապետը:

Էրդողանի խոսքով` Ցեղասպանության հերքումը քրեականացնող օրինագծի հեղինակ հանդիսացող «Հանուն ազգային շարժման միություն» (UMP)  կուսակցության նախաձեռնության հետևում կանգնած է նրա առաջնորդը` նախագահ Նիկոլա Սարկոզին: Թուրք վարչապետը վստահ է, որ այսկերպ Սարկոզին փորձում է ընտրազանգված հավաքել 2012-ին կայանալիք նախագահական և խորհրդարանական ընտրությունների համար:

«Եթե պարոն Սարկոզին չգիտի Ցեղասպանության մասին, նա կարող է այդ մասին հարցնել իր հորից` Պալ Սարկոզիից, ով 1940-ականներին Ալժիրի ֆրանսիական լեգիոնում է ծառայել: Վստահ եմ, նա իր որդուն Ալժիրում ֆրանսիացիների կողմից իրականացված սպանդի մասին պատմելու շատ բան ունի»,- հայտարարել է Էրդողանը:

Ավելի վաղ Թուրքիայի վարչապետը կարգադրել էր Փարիզից հետ կանչել թուրք դեսպանին: AFP –ի տեղեկություններով` ուրբաթ Թահսին Բուրջուօղլուն մեկնել է «Շարլ դը Գոլի» օդանավակայանից և խորհրդակցության նպատակով Անկարա ժամանել: Բացի դա, Թուրքիան մտադիր է չեղյալ հայտարարել Ֆրանսիայի հետ  բոլոր ռազմական, տնտեսական և քաղաքական ծրագրերը:

Ֆրանսիայի ԱԳ նախարար Ալեն Ժյուպեն իր հերթին նշել է, որ Թուրքիան չպետք է շտապի արձագանքել ֆրանսիացի խորհրդարանականների գործողություններին և այդ ամենը չպետք է շատ մոտ ընդունի սրտին, քանի որ երկու երկրներն էլ «դեռ աշխատելու տեղ ունեն»:

Ալժիրցիների ցեղասպանություն ասելով` Ռեջեփ Թայիփ Էրդողանը նկատի ունի 1945 թվականին սկսված ալժիրցիների պայքարը Ֆրանսիայից ազատագրվելու համար: Դրան հետևած 1954 թվականի պատերազմի հետևանքով տարբեր գնահատականներով Ալժիրում զոհվել են 300,000-ից մինչև մեկ միլիոն  մարդ, որոնց մեծ մասը խաղաղ բնակիչներն էին: