Խաբված մարդկանց վստահեցնում են, որ իրենց գործը քննվում է. նրանք մտադիր են շարունակել ակցիաները

Արամի, Բուզանդի, Սարյան, Եկմալյան փողոցների խաբված բնակարանատերերի գործն ընթացքի մեջ է, համապատասպան մարմինները զբաղվում են այդ խնդրով:

Այս մասին ՀՀ կառավարության շենքի մոտ բողոքի ակցիա անցկացնող բնակարանատերերին կառավարության նիստից հետո հայտարարել է ՀՀ նախագահի աշխատակազմի ղեկավար Վիգեն Սարգսյանը:

«Նա մոտեցավ ու ասաց, որ մեր հարցերն ընթացքի մեջ են ու իրենք զբաղվում են այդ խնդրով: Մենք պատասխանեցինք, որ ոչ մի բանավոր խոստման ալևս չենք հավատում և ուզում ենք, որ նախագահն անձամբ զբաղվի բնակարանատերերի խնդիրներով», – ասել է ակցիայի մասնակից Սոնա Մաղաքյանը:

Բողոքողներին մոտեցել է նաև Արդարադատության նախարար Հրայր Թովմասյանը, ով բնակիչների հետ զրույցում նշել է, որ պատրաստ է ընդունել նրանց:

«Խնդիրը կա, մի մասը օրենսդրական է, մի մասը` նոտարական մեղավորությունն է, մի մասը` մեր բնակիչների իրավագիտակցության ցածր աստիճանը: Կնքել են մի պայմանագիր` ենթադրելով, որ կնքում են մի այլ պայմանագիր, իհարկե, նոտարը մեղավոր է եղել որոշ դեպքերում, որ կողմերին չի բացատրել, թե ինչի տակ են ստորագրում և ինչպիսի հետևանքներ կարող են ստանալ: Օրենսդրական  փոփոխությունների անհրաժեշտություն կա, ու, եթե իրական լատինական նոտարական համակարգ ներդնենք, ապա կունենանք հետևյալ պատկերը` նոտարը 100%-անոց  պատասխանատվություն է կրելու իր կողմից  ցանկացած գործարքի վավերացման համար,  բայց այս դեպքում բնակչությունն է պետք է պատրաստ լինի`  նոտարական ծառայության վճարներն ավելանալու են: Քաղաքացին 100%-անոց  երաշխավորված է լինելու ոչ միայն նոր կառուցվող բնակարանների առք ու վաճառքի, այլև ցանկացած գործարքի պարագայում. նոտարը լինելու է ամբողջ գործարքի  պատասխանատուն», – ասել է Թովմասյանը:

Ըստ նախարարի, այս խնդիրները պետք է լուծվեն ու պետք է պարզվի, թե այս պահի դրությամբ, որտեղ է նոտարի մեղավորությունը:

«Այս փաստի առթիվ քրեական գործ կա հարուցված, բայց իմ կողմից հանձնարարված է ծառայողական քննություն անցկացնել ու էդ ամբողջն ուսումնասիրվում է: Մոտավորապես 500 գործից ավել է, մոտ 560 պայմանագիր է ստորագրվել ու պետք է այս բոլորին լսել: Այսինքն, ստորագրելուց մարդիկ հասկացել են, որ էդ տունն արդեն իսկ իրենցն է: Իրականում էն պայմանագիրը, որ իրենք ստորագրել են, նման բան չէր ենթադրվում: Իրենց համար պարզ չի եղել, թե ինչի տակ են իրենք ստորագրում», – ասել է Հրայր Թովմասյանը:

Չնայած վերջինիս հավաստիացումներին, որ գործի քննությունն ընթացքում է, բնակարանատերերը Epress.am-ի հետ զրույցում նշել են,որ չեն ցանկանում հանդիպել Հրայր Թովմասյանի հետ, այլ պահանջում են հանդիպում ՀՀ նախագահ Սերժ Սարգսյանի հետ: Նրանք հավաստիացրել են, որ վաղը կրկին շարունակելու են բողցոքի ակցիաները:

Հիշեցնենք, որ 2006 թվականին վերոնշյալ փողոցներում բնակվող բնակիչները դուրս են եկել իրենց տներից, որոնք հետագայում քանդել են, և դրանց փոխարեն կառուցվել են նոր բազմաբնակարանային շենքեր: 2006 թվականին «Գապբնակշին» ընկերության տնօրեն Գագիկ Պապոյանը պայմանագիր է կնքել իրենց հետ շենքը պատրաստ լինելուց հետո բնակարանով ապահովելու պայմանով, սակայն բնակարանները մինչ օրս չեն ստացել, դրանք վերավաճառվել են երրորդ անձանց: Դեպքի առնչությամբ անցյալ տարվա վերջին քրեական գործ են հարուցել, Պապոյանը փախուստի է դիմել: Բնակիչները Epress.am-ին պատմել են, որ ՀՔԾ-ում իրենց ասել են, թե գործը կարող է ամիսներ տևել, քանի որ դեպքերի առնչությամբ հարյուրավոր անձանց պետք է հարցաքննել: