Աշխարհում խմելու ջուրը չի հերիքում. ՄԱԿ

ՄԱԿ-ի տվյալներով, ջրային ռեսուրսների խնդիրն այնքան հիվանդագին է դառնում, որ անհրաժեշտ է արմատական լուծման ճանապարհներ գտնել:

Համապատասխան զեկույցը նախօրեին ներկայացվել է Ջրային ռեսուրսների  համաշխարհային Ֆորումին, որն իր աշխատանքներն է սկսում այսօր Մարսել քաղաքում:

Զեկույցում մասնավորապես նշվում է, որ Ասիայում բնակվում է երկրագնդի բնակչության 60%-ը, որին հասանելի է երկրագնդի ջրային ռեսուրսների մեկ երրորդը:

Խնդիրը բարդանում է եղանակային պայմանների փոփոխության, երկրագնդի աճող բնակչության սննդի սպառման անհրաժեշտության և հիգիենայի պարագաների պատճառով:

Փորձագետների գնահատականներով` 2050 թվականին արդյունաբերական արտադրանքի սպառումը կաճի 70%-ով: Գյուղատնտեսական նպատակներով օգտագործվող ջրի գլոբալ սպառումը կմեծանա 19% -ով և կանդրադառնա աշխարհի խմելու ջրի ռեսուրսների 90%-ի վրա:

Փորձագետները նշում են, որ այս թվերը վերջնական չեն և ջրի անհրաժեշտությունը կարող է էլ ավելի մեծանալ:

Ինչպես հաղորդում են ՄԱԿ-ը, ՅՈՒՆԻՍԵՖ-ը և Առողջապահության համաշխարհային կազմակերպությունը, այժմ խմելու ջուրը հասանելի է աշխարհի բնակչության 89%-ին, սակայն վաղ է հաղթանակ տոնել, քանի որ մոտ 800 մլն մարդ նախկինի պես ստիպված է բավարարվել աղտոտված աղբյուրներից: