Epress.am Լուրեր Հայաստանից
Լաչինում (Բերձոր) «Հիմնադիր խորհրդարանի» ավտոերթի ժամանակ ԼՂՀ ոստիկանության հարձակումը ոչ թե իրավապահ մարմինների պահվածք էր, այլ քրեական աշխարհին հարիր գործելաոճ: Այս մասին այսօր «Մեդիա կենտրոնում» լրագրողների հետ հանդիպման ժամանակ ասել է «Իրավունքի և ազատության կենտրոն» հասարակական կազմակերպության նախագահ Վարդան Հարությունյանը՝ նկատելով, որ ոստիկանության գործողությունները դրական են բնութագրել «մեր հասարակության և պառլամենտի քրեական աշխարհի ներկայացուցիչները», ԱԺ֊ի միայն այն «գեներալներն ու գեներալիկները, ովքեր իրենց բնույթով քրեական են»:
«Յուրաքանչյուր իրեն հարգող պետություն, իսկ եթե Արցախը իրեն հռչակել է պետություն, գոնե ինքն իրեն պետք է հարգի, անցանկալի շարասյունը կկանգնեցներ հսկող կետի մոտ և կասեր՝ ձեր ներկայությունը մեր երկրում ցանկալի չէ, գնացեք ձեր երկիր, ում ուզում եք զրկեք իշխանությունից: Արցախի իշխանությունների և ոստիկանության պահվածքը ցույց տվեց, որ այդ երկրում շատ ավելի քիչ են հարգում Արցախը, քան՝ մտահոգ մարդիկ Հայաստանում կամ Հայաստանից դուրս»,- ասել է իրավապաշտպանը՝ նկատելով, որ ԼՂՀ ոստիկանությունն ինքը հարվածեց ԼՂՀ հեղինակությանը:
Հարությունյանի կարծիքով՝ դեպքի առնչությամբ քրեական գործ, իհարկե, ֆորմալ առումով կհարուցվի:
«Սակայն օբյեկտիվ քննություն ակնկալելը միամտություն է, որովհետև այդ ամենը ծրագրված էր ամենաբարձր մակարդակով, մասնակից են եղել ուժային կառույցների ներկայացուցիչները: Շուտվանից է քննություն ակնկալելը մեզ մոտ միամտություն, ինչ֊որ բաներ կանեն, բայց դրանից չի կարող ծնվել ճշմարտություն, էլ չեմ խոսում իրավունքի վերականգնման մասին», – կանխատեսել է նա:
Պատասխանելով հարցադրմանը, թե այնուհանդերձ Հայաստանում ավտորիտար ռեժիմ չկա, Հարությունյանն ասել է, որ համաձայն է, սակայն դա Հայաստանի իշխանությունների բարի կամքից չէ, այլ ավտորիտար լինելու հնարավորություններ չունենալուց: