Epress.am Լուրեր Հայաստանից
Մի խումբ հայաստանցի լրագրողներ Ազգային ժողովի Էթիկայի մշտական հանձնաժողովից պահանջում են պատժել ՀՀԿ֊ական պատգամավոր Մհեր Սեդրակյանին՝ լրագրող Փայլակ Ֆահրադյանին հայհոյելու և վիրավորելու համար։ Այսօր նրանք ԱԺ֊ի դիմաց բողոքի ակցիա էին կազամկերպել՝ բարձրաձայնելով իրենց պահանջը։
Ակցիայի ընթացքում ելույթ է ունեցել ԱԺ «Ժառանգություն» խմբակցության պատգամավոր Զարուհի Փոստանջյանը, ով նշել է, որ միայն նման ճնշումների միջոցով է հնարավոր հասնել վարքագծի փոփոխմանը․ «Եթե չլինի ճնշում, ապա այս անհարգալից վերաբերմունքը կարող է վերածվել բռնության։ Միգուցե մենք չհասնենք այն բուն նպատակին, որ Մհեր Սեդրակայնի նման մարդիկ չլինեն ԱԺ-ում, բայց նման բողոքի ակցիաները որոշ չափով զսպելու են նաև մյուս պատգամավորներին»։
ՀԱԿ խմբակցության քարտուղար Արամ Մանուկյանն էլ լրագրողներին կոչ է արել երբեք ուրիշի վրա հույս չդնել և կանգնել սեփական իրավունքների համար։
«Էն երկրի վիճակը վիճակ չի, որտեղ լրագրողը աջակցության կարիք ունի։ Դուք պետք է պաշտպանեք ձեր իրավունքները․ հենց խեղճացաք, ձեզ կոչնչացնեն։ Եթե դուք թիմ լինեք, ոչ մի ածականով, գողականով ու փողոցային ժառգոնով ապրող պատգամավոր չի կարող ձեր քեֆին կպնել», ֊ ասել է Մանուկյանը։
Լրագրողներին աջակցություն է հայտնել ՀԱԿ խմբակցության մեկ այլ պատգամավոր, նախկին լրագրող Նիկոլ Փաշինյանը․ «Լրագրողների աշխատանքը կապված է տեղեկատվություն ստանալու հանրության իրավունքների հետ։ Լրագրողների հարցերը միշտ չէ, որ հաճելի են քաղաքական գործիչներին, բայց մենք պետք է հասկանանք, որ լրագրողները մեզ տալիս են հարցեր, որոնք հետաքրքում են հանրությանը։ Մենք կարիք ունենք այնպիսի հաասարակության, որը ճանաչում և հարգում է ոչ միայն իր, այլ նաև դիմացինի իրավունքները»։
Լրագրողները ստորագրահավաք էին կազմակերպել, որի ընթացքում նրանց պահանջին միացել էր 168 մարդ, այդ թվում՝ 7 պատգամավոր։