Home / Հայաստան / Ոստիկանությունը գերթանկարժեք ծրարներով է առաքում խախտումների մասին ծանուցումները․ «ՀԺ»

Ոստիկանությունը գերթանկարժեք ծրարներով է առաքում խախտումների մասին ծանուցումները․ «ՀԺ»

ՀՀ ոստիկանությունը 490 միլիոն դրամ է վճարելու «Հայփոստ» ընկերությանը՝  երթևեկության կանոնների խախտումների մասին ծանուցումները վարորդներին հասցնելու համար։ «Հայկական ժամանակ» օրաթերթը գրում է, որ ապրիլի 22-ին Ոստիկանությունը պայմանագիր է կնքել «Հայփոստ» ընկերության հետ՝ «փոստային կապի հետ  կապված սուրհանդակային կապի և օժանդակ ծառայությունների վճարովի մատուցման» համար։ 

««Հայփոստը» նամակները պետք է վերցնի Իսակովի 9 հասցեից՝ ճանապարհային ոստիկանությունից, և առաքի խախտում արած քաղաքացիներին․․․ փաստաթղթերում առկա թվային տվյալներից հասկանալի է դառնում, որ 490 միլիոն դրամի դիմաց «Հայփոստը» պետք է առաքի մոտ 1, 4 միլիոն ծանուցում․․․ այսինքն ՀՀ յուրաքանչյուր քաղաքացու բաժին է հասնելու առնվազն 1 խախտում»,- գրում է թերթը։ 

Պայմանագրի համաձայն, յուրաքանչյուր 20 գրամանոց առաքման, տվյալ դեպքում ծանուցման գինը 350 դրամ է։ Մինչդեռ, ըստ «ՀԺ»-ի,  նմանատիպ 20 գրամանոց ծրարն արժե 120 դրամ։ 

«Մնում է կանխատեսել, որ ոստիկանությունը երթևեկության խախտումների ծանուցումների առաքումը հարկատուներիս հաշվին պատվիրել է գերթանկարժեք՝ միգուցե ոսկեզօծ նշումներով ծրարներով։ Մինչդեռ ենթադրվում է, որ նման դեպքում պետք է ընտրվեր հնարավորինս էժան տարբերակ։ Չի բացառվում, որ այս գինը միտումնավոր է ուռճացվել, ինչը պետական գնումների դեպքում սովորական երևույթ է պետական համակարգում»,- գրում է թերթը՝ հավելելով, որ «Հայփոստը» նմանատիպ ևս մեկ պայմանագիր կնքել էր դեռևս հունվարի 25-ին, և այդ անգամ պայմանագրի արժեքը կազմել էր 160 միլիոն դրամ։ 

Մանրամասները՝ թերթի այսօրվա համարում։