«Բոլորը հոգու խորքում աջակցում են նրանց». Քաղաքացիները Երևանի կենտրոնում հավաքվելու կոչին չարձագանքեցին

Այսօր Երևանի կենտրոնի տարբեր հատվածներում հավաքվելու կոչին քաղաքացիները չէին արձագանքել: Կոչը համացանցում տարածվել էր «Մենք ենք տերը մեր երկրի» նախաձեռնության անունից, որը հորդորում էր քաղաքացիներին առավոտյան 10:00-ին հավաքվել Ազատության հրապարակում, Կենտրոն համայնքի դատարանի մոտ, Մաշտոցի պուրակում, Հանրապետության հրապարակում: Epress.am-ի լրագրողները այդ ժամին շրջել են Երևանի կենտրոնում, սակայն միայն Մաշտոցի պուրակում հանդիպել են մոտ 65 տարեկան Պավել Եդիգարյանին: Մեզ հետ զրույցում նա նշել է, որ հասկանում է երեկ Էրեբունի համայնքում ՊՊԾ գունդը գրաված անձանց շարժառիթները:

Նրա խոսքով` ՊՊԾ գունդը գրավված անձինք նման հուսահատ քայլի են դիմել, որովհետև իշխանություններն այլ ճանապարհ չեն թողել, և ինքն այսօր պատրաստ է միանալ նրանց:

«Ես էլ եմ ուզում իշխանությանն ասել, որ բաց թողնեն Ժիրայր Սեֆիլյանին, Գևորգ Սաֆարյանին և մյուս քաղբանտարկյալներին», – Epress.am-ի հետ զրույցում ասել է Պավել Եդիգարյանը:

Նրա կարծիքով՝ այսօր Մաշտոցի պուրակում իր հետ ոչ ոք չկա, որովհետև մարդիկ այլևս չեն հավատում, որ կարող է ինչ-որ բան փոխվել: Չնայած դրան, նա համոզված է, որ ստեղծված իրավիճակից ժողովուրդը  միայն կարող է ելք գտնել, եթե դուրս գա փողոց:

«Գուցե, այդ քայլը մարդկանց գիտակցության մեջ ինչ-որ բան կփոխի: Գուցե, իշխանությունն էլ հետևություն անի, չնայած նրանք չեն կարողանում հետևություն անել: Կարծում եմ, որ մեր բոլոր քաղաքացիներն էլ իրականում հոգու խորքում աջակցում են նրանց», – ասել է Եդիգարյանը:

Նշենք, որ հուլիսի 17 -ին, առավոտյան ժամը 05:00-ին Սասնա ծռեր խմբավորման անդամները զինված հարձակում են գործել ՊՊԾ շենքի վրա և գրավել այն: Բախման արդյունում  մահացել ՊՊԾ գնդի հրամանատարի տեղակալ, ոստիկանության գնդապետ Արթուր Վանոյանը: 2 այլ ոստիկաններ և խմբավորման անդամներից մեկը ստացել են հրազենային վնասվածք: