Կորոնավիրուսի թեստով հետազոտվել է մի քաղաքացի

Առողջապահության նախարարության Հիվանդությունների վերահսկման և կանխարգելման ազգային կենտրոնի «Ռեֆերենս» լաբորատոր կենտրոնում տեղի է ունեցել ճեպազրույց, որտեղ մասնագետները ներկայացրել են կորոնավիրուսի թեստերի կիրառման հրահանգները և պարզաբանել դրանց առնչվող հարցերը:

Նոր կորոնավիրուսի ախտորոշման 200 թեստ Հայաստանին անվճար հատկացվել է Ռուսաստանի Դաշնության կողմից․ այժմ դրամք գտնվում են «Ռեֆերենս» լաբորատոր կենտրոնում: Թեստերը 99%-ով ճշգրիտ են։

ԱՆ հիվանդությունների վերահսկման և կանխարգելման ազգային կենտրոնի փոխտնօրեն Նունե Բակունցը նշել է, որ հետազոտվել է մի քաղաքացի, որի մոտ կորոնավիրուսի վարակի կասկած կար. պատասխանը` կորոնավիրուս չի հայտնաբերվել:

Կենտրոնի վիրուսաբանական լաբորատորիայի վարիչ Շուշան Սարգսյանը մանրամասնել է, որ մասնագետը նմուշներ է հավաքում պացիենտի քթից և կոկորդի խորխից, հետազոտությունը տևում է 3-ից 4 ժամ: Այն արվում է պոլիմերազային շղթայական ռեակցիայի (ՊՇՌ) մեթոդով, որը Հայաստանում վաղուց է կիրառվում, սակայն տվյալ հետազոտության անցկացման համար պահանջվում են հատուկ թեստեր:

Այն պացիենտները, որոնց մոտ նկատվում են տվյալ ախտանշանները, հետազոտությունը կատարվում է անվճար: