Home / Առողջապահություն / Կինը պատմել է, որ ոստիկանները խոշտանգել են իրեն և փակել հոգեբուժարանում

Կինը պատմել է, որ ոստիկանները խոշտանգել են իրեն և փակել հոգեբուժարանում

Հելսինկյան քաղաքացիական ասամբլեայի Վանաձորի գրասենյակ է ահազանգել Սպիտակի բնակչուհի և հայտնել, որ 2020թ․ մարտի 24-ից բռնի պահվում է Ավան հոգեկան առողջության կենտրոնում։

Կինը հոգեբուժարանում է հայտնվել Հայաստանի գլխավոր դատախազության դիմաց բողոքի գործողության պատճառով։ Նա բողոքել է, որ որդին, իր կարծիքով, անհիմն քրեական հետապնդման է ենթարկվում, և որպես բողոքի նշան փորձել է բենզինով ինքնահրկզվել։

Ինքնահրկիզման փորձը կանխել են ոստիկանները և առանց տեղեկացնելու, թե ուր են տանում ու ինչի համար, տարել են Ոստիկանության կենտրոնական բաժին և այնտեղ պահել 8 ժամ։

«Եկել եմ դատախազություն, չեն ընդունել, ինձ ասում են՝ վիրուս ես բերել Սպիտակից»։ Կինը պատմել է, որ նրան ոստիկանությունում գտնվելու ընթացքում բռնության են ենթարկել, զրկել զուգարան գնալու, ուտելու հնարավորությունից։ Ապա խաբեությամբ տեղափոխել են Ավան հոգեկան առողջության կենտրոն։

«Եթե իրանք տեսախցիկ ունեն, թող միացնեն, մի քանի ոստիկանով մազերս պոկել են, ծեծել են, թևս չի շարժվում, հինգ օր ա ստեղ եմ, դատական բժիշկ էլ չի եկել։ Ութ ժամ պահելուց հետո եկել են երկու կապույտ շորերով մարդիկ, ինձ չեն ասել, թե ով են, ասել են, թե քեզ պիտի մի հատ պրոֆեսոր նայի, երկու ժամ քո հետ կխոսեն ու բաց կթողեն։ Ինձ բերեցին ստեղ փակեցին, հետո ինձ խաբեցին, ասեցին՝ գրի քո ձեռքով, որ ուզում ես բուժվես, ստիպելով դեղեր են տալիս, վատանում եմ դրանցից։ Էսօր զանգել եմ 1-02, մի հատ ոստիկան ա եկել, ուզում էր հեռախոսս խլի, չեմ թողել»։

Կնոջն ասել են, որ կարողա երեք ամիս էլ դատավորն իրեն պահի հոգեբուժարանում։ «Ես հիվանդ չեմ, ինձ խի են պահել, ես դա արել եմ, որ ուշադրություն դարձնի դատախազը»։

Քաղաքացին հայտնեց, որ հոգեբուժարան տեղափոխելուց առաջ երկրում համաճարակային վիճակով պայմանավորված որևէ կանխարգելիչ գործողություն, այդ թվում՝ ջերմաչափում կամ թեստավորում չեն արել։

ՀՔԱ Վանաձորի գրասենյակը Ս․Ս․-ի հայտնած տեղեկությունների հիման վրա հանցագործության մասին հաղորդում կներկայացնի գլխավոր դատախազին և նրան հոգեբուժարանում պահելու հիմքերի ու պատճառների մասին հարցում կուղարկի առողջապահության նախարարություն։