Ալկոհոլային թունավորման նոր դեպքեր են հաստատվել

Արմավիրում օղու թունավորման հետևանքով տուժածների թիվն ավելացել է 11-ով, հայտնում է Առողջապահության նախարարությունը:

Օգոստոսի 31-ից սեպտեմբերի 3-ի Հայաստանում արձանագրվել է ալկոհոլային թունավորման 38 դեպք, որից 25-ը` Արմավիրի մարզից, 12-ը` Երևանից, 1-ը` Կոտայքի մարզից: Գրանցվել է մահվան 14 դեպք:

Իրականացված համաճարակաբանական հետազոտության արդյունքում պարզվել է, որ Արմավիրի մարզի տուժածների թունավորման հավանական աղբյուր է հանդիսացել մեկ վայրից ձեռք բերված ոչ գործարանային արտադրության օղու օգտագործումը:

Երևանի դեպքերից տուժածների մեծամասնությունն օգտագործել է բժշկական սպիրտ` որպես օղու փոխարինիչ, մյուս մասի, ինչպես նաև Կոտայքի մարզում արձանագրված դեպքից տուժածի օգտագործած սպիրտի տեսակը պարզելու համար համաճարակաբանական հետազոտությունները շարունակվում են:

Ավելի վաղ դեպքի առթիվ քրեական գործ էր հարուցվել, կա երեք ձերբակալված անձ, նախաքննությունը շարունակվում է։