Epress.am Լուրեր Հայաստանից
Կառավարությունը սոցիալական աջակցություն կտրամադրի ղարաբաղյան պատերազմի հետևանքով զոհված խաղաղ բնակիչների ընտանիքներին և հաշմանդամություն ստացած քաղաքացիական անձանց։ Աջակցության ծրագիրը հաստատվել է այսօր՝ գործադիրի դեկտեմբերի 3-ի նիստին։
Միանվագ դրամական աջակցությունը կարող են ստանալ ինչպես Հայաստանի, այնպես էլ Արցախի քաղաքացիները․
— Առաջին խմբի հաշմանդամության կամ հաշմանդամ երեխայի կարգավիճակ ձեռք բերելու դեպքում՝ 3 միլիոն դրամի չափով,
— Երկրորդ խմբի հաշմանդամություն ձեռք բերելու դեպքում` 2 մլն դրամի չափով,
— Երրորդ խմբի հաշմանդամություն ձեռք բերելու դեպքում` 1 մլն դրամի չափով,
— զոհված քաղաքացիական անձանց ընտանիքներին՝ 5 մլն դրամի չափով:
Միջոցառումից օգտվելու համար քաղաքացիները պետք է էլեկտրոնային եղանակով՝ մինչև 2021 թվականի ապրիլի 1-ը, դիմում ներկայացնեն։ Գումարը կփոխանցվի բանկային հաշվեհամարին:
Աջակցության ծրագիրը վերաբերում է բացառապես քաղաքացիական անձանց։ Զինծառայողների և նրանց ընտանիքների փոխհատուցման հարցը կարգավորվում է «Զինծառայողների ապահովագրության հիմնադրամ»-ի միջոցով:
Միջոցառմամբ սահմանված սոցիալական աջակցությունից չեն կարող օգտվել «Սահմանամերձ համայնքների սոցիալական աջակցության մասին» օրենքի հիման վրա միանվագ գումարային աջակցություն կամ հատուցում ստանալու իրավունք ունեցող անձինք: