Home / Հայաստան / ՊԵԿ պաշտոնատար անձինք խոշոր չափերով կաշառք են ստացել․ ԱԱԾ

ՊԵԿ պաշտոնատար անձինք խոշոր չափերով կաշառք են ստացել․ ԱԱԾ

Բացահայտվել են ՊԵԿ պաշտոնատար անձանց կողմից առանձնապես խոշոր չափերով կաշառք ստանալու դեպքեր, հայտնում է ԱԱԾ-ն:

Հաղորդագրության համաձայն՝  ձեռք են բերվել փաստական տվյալներ, որ ՊԵԿ հետաքննության և օպերատիվ-հետախուզության վարչության Լոռու բաժնի պետը, նախնական համաձայնության գալով իր անմիջական ենթակայությամբ գործող օպերլիազորների հետ, մայիս-հունիս ամիսներին 1 900 000 դրամ են ստացել  Լոռիում գրանցված 4 տնտեսվարող սուբյեկտներից՝ հարկային օրենսդրության ոլորտում թույլ տրված տարատեսակ խախտումները չարձանագրելու և մեղավորներին վարչական պատասխանատվության չենթարկելու, ստուգման ընթացքում ի հայտ եկած խախտումները չարձանագրելու համար:  Կաշառքը ՊԵԿ պաշտոնյաները բաժանել են միմյանց միջև:

Դեպքի առթիվ հարուցված քրգործի շրջանակներում հիշյալ հարկային ծառայողները, ինչպես նաև նրանց կաշառք տված տնտեսվարողները հանցանք կատարելու մեջ անմիջականորեն ծագած կասկածանքով ձերբակալվել են:

Պաշտոնյաներին մեղադրանք է առաջադրվել, նրանց նկատմամբ որպես խափանման միջոց է կիրառվել կալանավորումը: Կալանավորվել է նաև պաշտոնատար անձանց 1 միլիոն դրամ կաշառք տված ընկերության տնօրենը, իսկ կաշառք տված մյուս մարդկանց նկատմամբ կիրառվել են անազատության հետ չկապված խափանման միջոցներ:

Tekali Taxi