Epress.am Լուրեր Հայաստանից
Բարձրագույն դատական խորհուրդը դադարեցրել է Ռուբեն Վարդազարյանի լիազորությունները` «էական կարգապահական խախտման հիմքով»։ Վարդազարյանը ԲԴԽ նախագահ էր դարձել 2019-ի հուլիսին, 2022-ի ապրիլին քրեական գործ էր հարուցվել, ԲԴԽ նախագահի պաշտոնում նրա լիազորությունները կասեցվել էին։ ԲԴԽ նախագահի պաշտոնակատար էր դարձել Գագիկ Ջհանգիրյանը։
Ռուբեն Վարդազարյանը մեղադրվում է արդարադատության իրականացմանը խոչընդոտելու համար: Ըստ մեղադրանքի՝ պաշտոնավարման ընթացքում, նա միջամտել է Լոռու մարզի ընդհանուր իրավասության դատարանի դատավոր Անդրանիկ Սիմոնյանի՝ արդարադատության իրականացմանը:
Հիշեցնենք՝ օրեր առաջ Վարդազարյանը հրապարակել էր Ջհանգիրյանի հետ իր մասնավոր զրույցի գաղտնի ձայնագրությունը, որում լսվում է, թե ինչպես է ԲԴԽ նախագահի գործող պաշտոնակատարը խոստովանում, որ խառնվում է քրեական գործերի ընթացքին («սաղ փակել եմ»), խոչընդոտում որոշ գործերի հարուցմանը և ինդուլգենցիաներ խոստանում որոշ գործողությունների դիմաց։
Ջհանգիրյանը շարունակում է պաշտոնավարել․ քաղաքական պարզաբանումներ, բացատրություններ չկան։ Նրա պաշտոնանկության հարցը ԲԴԽ-ն չի էլ քննարկում։