Իշխանությունն ընդդիմության հետ կերկխոսի, բայց ոչ արտահերթի շուրջ. Շարմազանով

ԱԺ ՀՀԿ խմբակցության քարտուղար Էդուարդ Շարմազանովը, այսօր լրագրողների հետ հանդիպման ժամանակ ամփոփելով քաղաքական գարունը, այն անվանել է թեժ, բայց միևնույն ժամանակ կառուցողական և համերաշխության գործունեությանը միտված քաղաքական գարուն:

«Եվ 2011-ի գարունը շահեկանորեն տարբերվեց  գոնե վերջին շրջանի քաղաքական գարուններից նրանով, որ այստեղ և ընդդիմությունը՝ լինի պառլամենտական, թե արտախոհրդարանական, թե, առաջին հերթին, նաև իշխանությունը մեծ ջաքներ գործադրեցին Հայաստանում երկխոսության, համերաշխության և հանդուրժողականության մթնոլորտ ձևավորելու ուղղությամբ»,- նշել է Շարմազանովը:

Նկատի ունենալով համաներման փաստը և քրեական օրենսգրքում կատարված փոփոխությունները՝ ՀՀԿ-ականն ընգծել է, որ այս իմաստով, կարևորագույն քայլ է կատարել Սերժ Սարգսյանը, երբ  ապրիլի 27-ին մատնանշել է, որ ինքը պատրաստակամ է իրականացնելու քայլեր, որոնք միտված կլինեն երկրում քաղաքական մշակույթի ձևավորմանն ու զարգացմանը, ինչպես նաև ներքաղաքական իրավիճակի լիցքաթափմանը:

Նա նաև նշել է, որ իշխանությունների դրական քայլերը, որոնք, իր խոսքով, միտված էին երկրում հանդուրժողականության մթնոլորտի ձևավորմանը, ինչպես նաև քաղաքական պրոցեսների բացառապես քաղաքակիրթ ճանապարհով ուղղորդմանը, դրական արձագանքեցին իրենց արտախորհրդարանական գործընկերները:

«Եվ  նաև առաջին նախագահը դրական գնահատեց այս փուլը` ասելով, որ գնում է  բաց դիալոգ: Ավելին` նշելով, որ երկխոսությունը չպետք է ընդհատվի», –  հայտարարել է Շարմազազնովը:

Խոսելով երկրում ժողովրդավարական բարեփոխումների մասին՝ նա մեջբերել է Սերժ Սարգսյանի մայիսի 28-ի ելույթից մի հատված, որտեղ, Շարմազանովի խոսքով,  նախագահը նոր քաղաքական օրակարգ ձևավորեց և առաջարկեց քաղաքական ուժերին և, առաջին հերթին, քաղաքական իշխանությանը նոր բանաձև:

«Իսկ այդ բանաձևը կայանում է նրանում, որ անհատի և քաղաքացու իրավունքները այնքան կարևոր են, որքան հավաքական ազգային շահերը: Ամենաուժեղ պատվարը արտաքին և ներքին ցնցումներից և արտաքին թշնամիներից  ու ներքին անօրինականություններից պաշտպանվելու՝ դա ազատ քաղաքացին է և միայն ազատ քաղաքացու առկայության դեպքում մենք կարող ենք հասնել մեր նպատակներին ու մեր երազած Հայաստանին: Սա նոր երևույթ է Հայաստանի քաղաքական դաշտում»,- ասել է  Էդուարդ Շարմազանովը:

Լրագրողների այն դիտարմանը, թե Հայ Ազգային Կոնգրեսը հայտարարում է, որ իշխանությունների հետ երկխոսելու մեկ թեմա ունի և դա րատահերթ նախագահական ընտրություններն են՝ Շարմազանովը պատասխանել է, որ այս պահին արտահերթ ընտրությունների հավանականություն, ինչպես նաև դրանց անցկացման համար քաղաքական և և իրավական որևէ դրդապատճառ չի տեսնում:

Եվս մեկ հարցին, թե այդ դեպքում ինչի մասին է իշխանությունը երկխոսելու ընդդիմության հետ, ՀՀԿ-ական գործիչը պատասխանել է, որ երկխոսելու են քաղաքական, տնտեսական և արտաքին կարևորագույն հարցերի շուրջ: