Epress.am Լուրեր Հայաստանից
Միավորված ազգային կուսակցության նախագահ, գործարար Գուրգեն Արսենյանը, ով դատական հայց էր ներկայացրել Երևանի քաղաքապետարանի դեմ իր գովազդային վահանակները ապամոնտաժելու համար, մինչև վերջ պաշտպանելու է իր իրավունքները: Այս մասին նա հայտարարել է «Առավոտ» օրոթերթի հետ զրույցում:
«Հուսով եմ, որ քաղաքապետարանի պաշտոնյաները Հայաստանում դատական գործընթացների վրա որևէ էական ազդեցություն չեն կարող ունենալ, որովհետև դրանով մենք կկարողանանք գոնե ինչ-որ անուրջներ ունենալ դատական համակարգի անկախության վերաբերյալ», – ասել է Արսենյանը:
Հիշեցնենք, որ Երևանի նախկին քաղաքապետ Կարեն Կարապետյանը որոշել էր քաղաքի կենտրոնական փողոցները «մաքրել» գովազդային վահանակներից:
Գովազդային վահանակներ տեղադրելու հնարավորություն մինչև այժմ ունեին ՄԱԿ նախագահ Գուրգեն Արսենյանին պատկանող «Յունիքոլ գրուպ» և Նուշիկյաններին պատկանող «Նուշիկյան ասոցիացիա» ընկերությունը:
«Չորրորդ ինքնիշխանություն» թերթը գրել էր, որ Կարեն Կարապետյանի փեսան սկսել է գովազդային էկրաններ ներկրել, և քաղաքապետը որոշել է խթանել նրա բիզնես գործունեությունը, այն է` գովազդային վահանակները փոխարինել գովազդային էկրաններով: