Epress.am Լուրեր Հայաստանից
Այս պահին Հայաստանում համաճարակային հիվանդությունների առումով առկա է համեմատաբար կայուն վիճակ:
Այս մասին Epress.am-ի հետ զրույցում ասել է Առողջապահության նախարարության պետական հիգիենիկ և հակահամաճարակային հսկողության տեսչության գլխավոր մասնագետ Լիանա Թորոսյանը:
Նրա խոսքով` ՀՀ-ում գրիպի և սուր շնչառական հիվանդությունների համաճարակը սկսվում է հոկտեմբերի առաջին օրերին և ավարտվում է ուշ գարնանը: Լիանա Թորոսյանը տեղեկացրել է, որ իրենք յուրաքանչյուր շաբաթ դիտարկում են իրականացում և ամփոփ տվյալները ներկայացվում են նախարարին, որից հետո վերլուծությունների հիման վրա որոշվում է` արդյոք վիճակը համաճարակային է, թե ոչ:
«Այս շաբաթվա կտրվածքով սուր շնչառական վարակներով հիվանդացության մակարդակը Հայաստանում կազմում է 3000-3500 դեպք: Դա պաշտոնական վիճակագրությունն է, հաշվառված են այն մարդիկ, ովքեր դիմել են բուժօգնության համար: Սուր շնչառական վարակները պայմանավորված են եղանակային պայմաններով, մրսածության մակարդակով: Այս հիվանդություններն առաջանում են ջերմաստիճանի նվազման, փակ տարածքներում շփման և վատ օդափոխության հետևանքով: Այս տարի մենք ունենք հիվանդացության նույն մակարդակը, ինչ անցյալ տարի», – ասել է Լիանա Թորոսյանը:
Նա նաև խորհուրդ է տվել հիվանդության դեպքում չզբաղվել ինքնաբուժությամբ և ծանոթ-բարեկամների խորհրդով սուր շնչառական վարակների դեպքում չօգտագործել անտիբիոտիկներ, քանի որ դրանք չեն օգնում, իսկ երեխաների հիվանդ լինելու դեպքում խորհուրդ է տրվում անմիջապես հրավիրել մանկաբույժին:
Լիանա Թորոսյանը նաև տեղեկացրել է, որ Առողջապահության համաշխարհային կազմակերպության կողմից որոշվել է պատվաստումներ իրականացնել խոցելի խմբերի շրջանում: Այդ խմբերն են թերապևտները, բուժքույրերը, շտապօգնության անձնակազմը, մարդիկ որոնք մշտապես շփվում են հիվանդների հետ:
Պատվաստվելու են նաև մանկատան երեխաները, ծերանոցների ծերերը, դպրոց-ինտերնատների երեխաները, որոնց մոտ իմունիտետը համեմատաբար թույլ է: Այս ծրագիրն իրականացվում է պետպատվերի շրջանակներում: