Մի քանիսին կարող են «ժերտվա» տալ. Արամ Մանուկյանի գիտի՝ ով զոհաբերվելու ենթակա չէ

Տպավորություն կա, որ վարչապետին փորձում են դարձնել քավության նոխազ: Այս մասին այսօր ԱԺ-ում հայտարարությունների ժամին ասել է ՀԱԿ խմբակցության պատգամավոր Արամ Մանուկյանը:

Նա նշել է, որ իր կարծիքը կհիմնավորվի, եթե ապացուցվի օֆշորային սկանդալը:

Ըստ պատգամավորի՝ ամեն ինչ արվում է մեկ մարդու՝ Սերժ Սարգսյանի թելադրանքով, և որևէ բնագավառում գործող բիզնեսմենը չի կարող խուսափել կեղծիքներ անելուց: 

Մանուկյանը նաև անդրադարձել է երեկ ԱԺ-ում ներկայացված Վերահսկիչ պալատի հաշվետվությանը՝ ընդգծելով, որ նման հաշվետվություն ՎՊ նախագահ Իշխան Զաքարյանը ներկայացրել է երեք անգամ, սակայն պատժվողներ այդպես էլ չեն եղել:

«Սա սովորական միջոց է էդ մարդկանց ճնշման տակ պահելու: Սսովորական բեմադրություն է երեք արարով», – ասել է Մանուկյանը:

ՀԱԿ պատգամավորը չի բացառել, որ իշխանությունը հնարավոր է մի քանի «ժեռտվա» տա, սակայն դա չի նշանակի, որ կոռուպցիան հաղթարաված է, քանի որ պատժված չեն լինի համակարգը ստեղծողները: 

«Նույնիսկ խանութում վաճառողը հանցագործության մասնակից է: Գնացեք, հարցրեք, կտեսնեք, որ ապրանքներն այլ անուններով են գրանցել, որպեսզի կարողանանան հարկերը տալ: Ստիպված ես աշխատել միայն խախտումների միջոցով: Որոշ մարդիկ պատգամավոր են դարձել հենց այն պատճառով, որ իրենց վրա կա դոսյե: Սա ավտորիտար ռեժիմ ա, մենակ մեկն է, որ ենթակա չէ  զոհաբերվելու», – ասել է Արամ Մանուկյանը՝ նշելով, որ դա Սերժ Սարգսյանն է:

Այն հարցին, թե ինչու է իշխանությունը մեղադրում ընդդիմությանը և այժմ ստանձնել է նրան քննադատելու գործառույթը՝ Մանուկյանն ասել է, որ մեղքը ընդդիմությանը վրա քցելը համարում է լկտիություն:

Ըստ նրա՝ նման քաղաքականությունը նորություն չէ. ՀՀԿ-ն դրսի խնդիների մեջ մեղադրում է թուրքերին, ադրբեջանցիներին, ներքին խնդիրների համար ՝  ընդդիմությանը: