Epress.am Լուրեր Հայաստանից
«Չորրորդ ինքնիշխանություն» թերթի լրագրող Անի Գևորգյանը փետրվարի 12-ի դեպքերի հետ կապված Հատուկ քննչական ծառայությունում հանցագործության մասին հաղորդում է ներկայացրել։ Այս մասին Գևորգյանն ասել է Epress.am-ի հետ զրույցում։
«Հաղորդման մեջ երեք դրվագ եմ ներկայացրել․ առաջինը վերաբերում է Մաշտոցի պողոտայում ոստիկան Վարդան Գևորգյանի կողմից իմ նկատմամբ կիրառված բռնությանը, երբ վերջինս քաշքշում էր ինձ՝ փորձելով խլել տեսախցիկս, երկրորդ դրվագը կապված է ոստիկանուհու կողմից իմ տեսախցիկի հիշողության քարտերի գողանալու հետ և երրորդ դրվագը, երբ Կենտրոնի ոստիկանության բաժնի պետ Արտակ Պողոսյանը հարվածում է դեմքիս ու խլում հեռախոսս», – պատմել է մեր զրուցակիցը։
Նրա խոսքով՝ իրեն դատաբժշկական ուղեգիր են տվել, և ինքը գնացել է փորձաքննության։
«Դատաբժիշկը զննեց, նշումներ կատարեց ու առաջիկայում եզրակացությունը կուղարկի ՀՔԾ-ի քննիչին», – նշել է Գևորգյանը։
Վերջինս ընդգծել է, որ վաղը կրկին գնալու է ՀՔԾ՝ ներկայացրած հաղորդման հետ կապված մանրամասն բացատրություններ տալու։
«Ներկա պահին ոստիկանության ներքին անվտանգության ծառայության վարչությունում ևս ծառայողական քննություն է ընթանում, ինչպես նաև վաղը կանչել են ոստիկանություն՝ խուլիգանության հոդվածով հարուցված քրեական գործի շրջանակներում որպես վկա հարցաքննվելու», – եզրափակել է մեր զրուցակիցը։