Epress.am Լուրեր Հայաստանից
«Հելսինկյան քաղաքացիական ասամբլեայի» Վանաձորի գրասենյակը դատապարտում քաղբանտարկյալ Շանթ Հարությունյանի որդու՝ Շահեն Հարությունյանի նկատմամբ անհիմն մեղադրանքի առաջադրումը: Այս մասին ասված է գրասենյակի տարածած հայտարարության մեջ։
Հայտարարության հեղինակները, մասնավորապես, նշում են․
«2014 թ. ապրիլի 2-ին ՀՀ ոստիկանության քննչական գլխավոր վարչության կողմից Շանթ Հարությունյանի որդու՝ Շահեն Հարությունյանի նկատմամբ մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով` խուլիգանություն՝ զենք-զինամթերքի գործադրմամբ: Այսպիսով, ՀՀ ոստիկանությունը, ՀՀ Հատուկ քննչական ծառայությունը և ՀՀ գլխավոր դատախազությունը այդպես էլ քննության առարկա չդարձրեցին 2013 թ. նոյեմբերի 5-ին ոստիկանության բաժին տեղափոխելուց հետո Շանթ Հարությունյանի և նրա որդու նկատմամբ ՀՀ ոստիկանապետ Վլադիմիր Գասպարյանի կողմից բռնության փաստը, ավելին մեղադրանքներ առաջադրվեցին բռնության ենթարկվածների նկատմամբ: Երկու օր առաջ նույն հոդվածով մեղադրանք առաջադրվեց արդեն վեց ամիս ապօրինի կալանքի տակ գտնվող Շանթ Հարութունյանին:
Մեղադրանքի առաջադրումը անչափահաս Շահեն Հարությունյանին որակում ենք որպես.
– Ճնշման հերթական գործողություն Շանթ Հարութունյանի նկատմամբ
– Քաղաքական հետապնդում անչափահաս քաղաքացու նկատմամբ
– Խստորեն դատապարտում ենք ՀՀ իրավապահ մարմինների կողմից ընտրողական վարքագիծը, ակնհայտ անհիմն մեղադրանքի առաջադրումը Շահեն Հարությունյանի նկատմամբ:
– Պահանջում ենք անհապաղ դադարեցնել հրապարակային պատժիչ գործողությունները և քաղաքական հետապնդումը Շանթ Հարությունյանի և նրա ընկերների նկատմամբ, վերացնել անչափահաս Շահեն Հարութունյանի նկատմամբ ապօրինի մեղադրանքը»:
Լուսանկարը՝ Շահեն Հարությունյանի «Ֆեյսբուք»-ի էջից