Epress.am Լուրեր Հայաստանից
Հայաստանում «սոցիալական բունտի» հնարավորության մասին քննարկումները սահմանափակվում են քաղաքական գործիչների ասուլիսներով, դրանք հերքող կամ հաստատող դատողություններով, գրում է «168 ժամ» պարբերականը:
Սակայն բունտի նախադրյալները ամեն օր ավելի արտահայտիչ են դառնում շարքային քաղաքացիների առօրյա կյանքում, կենցաղում, և դա նկատելու համար «մեծ քաղաքականության» մասնակից լինել պետք չէ: Միայն սննդամթերքի անընդհատ թանկացումները մարդկանց օր օրի ավելի են մոտեցնում այն սահմանագծին, որից այն կողմ հենց այդ «սոցիալական բունտ» կոչվածն է:
Իշխանությունները որևէ կոնկրետ քայլ չեն անում այդ իրավիճակը մեղմելու ուղղությամբ և խորապես ներքաշված են մի կողմից` ներքաղաքական «ռազբորկաների», մյուս կողմից` արտաքին քաղաքական խաղերի մեջ: Թվում է, թե այս իրավիճակում գոնե գործադիր իշխանությունը, գոնե ձևականորեն պետք է ինչ-որ քայլեր կատարեր հասարակությանը հույս ներշնչելու համար: Սակայն բավական է հետևել վարչապետ Տիգրան Սարգսյանի աշխատանքային առօրյայի մասին պատմող պաշտոնական հաղորդագրություններին, համոզվելու համար, որ կառավարությունը` նրա գլխավորությամբ, ավելի է մեծացնում սոցիալական բունտի հնարավորությունը: Օրինակ, երեկ Տիգրան Սարգսյանը դասախոսություն է կարդացել բանակի ավագ սպայակազմի համար: Սա կլիներ ծիծաղելի, եթե այդքան տխուր չլիներ: Իսկ անցած շաբաթ նա իր անձնական բլոգում ինչ-որ հաղորդագրություն է թողել, պատմում է նրա մամուլի ծառայությունը: Կարևոր չէ` ինչի մասին, քանի որ քննարկել այդ գործելակերպը, կնշանակի` լուրջ վերաբերվել ՀՀ-ում վարվող «տնտեսական քաղաքականությանը»: Շատ խորհրդանշական է, որ Տ. Սարգսյանը սկսել է ավելի ակտիվ ներկայանալ վիրտուալ տարածության մեջ: «Վիրտուալ Հայաստանի» ավելի լավ վարչապետ դժվար է պատկերացնել: Անցած շաբաթ Բորիս Նեմցովը շատ դիպուկ բնորոշել էր ՌԴ նախագահ Դմիտրի Մեդվեդևին` հայտարարելով, որ նա ոչ թե նախագահ է, այլ բլոգեր: Այս գնահատականը միանգամայն համապատասխանում է նաև մեր վարչապետին: