«Առավոտ». Մեր աղքատ և հարուստ նախարարները

«Առավոտը» «հաշվել է» նախարարների եկամուտները

ՀՀ կառավարությանն առընթեր Պետեկամուտների
կոմիտեն Ինֆորմացիայի ազատության կենտրոնի` տեղեկություն ստանալու հարցմանն ի
պատասխան, տրամադրել է ՀՀ նախարարների և մի քանի այլ պաշտոնյաների եկամուտների
հայտարարագրերի մասին 2009թ. տեղեկանքները:

Ըստ այդ տեղեկանքների, ամենաաղքատը ՀՀ աշխատանքի
պետական տեսչության պետ Արթուր Պետրոսյանն է, որի եկամուտը կազմել է 857421 դրամ,
իսկ ամենահարուստը` առողջապահության նախարար Հարություն Քուշքյանը: Նրա եկամուտը
կազմել է 341 մլն 615 հազար դրամ:

Համեստ`ընդամենը 3-6 մլն դրամ եկամուտ են
ունեցել (համապատասխանաբար) տարածքային կառավարման նախարար Արմեն Գևորգյանը,
մշակույթի նախարար Հասմիկ Պողոսյանը, էներգետիկայի և բնական պաշարների նախարար
Արմեն Մովսիսյանը և այլն:

Վատ չի վաստակել գիտության և կրթության նախարար
Արմեն Աշոտյանը`39.036.547 դրամ, բայց նաև ծախսեր է արել. գնել է շենք և
շինություն: Ի դեպ, շենք-շինություն է գնել նաև արդարադատության նախարարը, բայց,
դատելով նրա եկամուտներից, շինությունը պետք է որ շատ համեստ լինի`11 միլիոնի
չհասնող եկամտին համապատասխան: