Իմ դեմ ծավալվող քաղաքական հետապնդումները ավելի են ահագնացել. Փաշինյան

«Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանի փաստաբան Վահե Գրիգորյանին թույլ չեն տվել առանձնազրույց ունենալ իր վստահորդի հետ, երբ նա այսօր այցելել է «Արթիկ» քրեակատարողական հիմնարկ:

Փաստաբանի փոխանցմամբ «Արթիկ» ՔՀԿ-ում իրենք արձանագրություն են կազմել, որտեղ նշել են, որ դեկտեմբերի 13-ին, ժամը 13:50-ի սահմաններում ՔԿՀ հերթապահ մասի ընդունելությունների սենյակում հանդիպել է Նիկոլ Փաշինյանի հետ, սակայն նույն վայր մուտք է գործել նաև ՔԿՀ պետի տեղակալ, արդարադատության մայոր պարոն Ա. Խաչատրյանը:
Գրիգորյանը խնդրել է Խաչատրյանին դուրս գալ առանձնատեսակցության սենյակից կամ որևէ այլ կերպ հնարավորություն ընձեռել իր վստահորդի հետ գաղտնապահության պայամաններում զրուցել` «Փաստաբանության մասին» ՀՀ օրենքի և Մարդու իրավունքների և հիմնարար ազատություններ պաշտպանության մասին կոնվենցիայի 34 հոդվածով նախատեսված պահանջներին համապատասխան: Փաստաբանը պատրաստվում էր զրուցել Փաշինյանի հետ Եվրոպական դատարան ներկայացվելիք փաստաթղթերի վերջնական տեքստը համաձայնեցնելու համար:

Գրիգորյանը նշում է, որ այդ ընթացքում Նիկոլ Փաշինյանը հայտարարել է, որ առ այսօր իրեն փաստաբանի հետ, այսինքն «Արթիկ» ՔԿՀ տեխափոխվելուս պահից` 30. 11. 2010թ.-ից առանձնատեսակցության հնարավորություն չի ընձեռվում, ինչպես նաև 02.12.2010թ-ից առ այսօր ինքը թվով յոթ նամակ է հանձնել «Արթիկ» ՔԿՀ վարչակազմին: Այդ ծրարները ուղղված են եղել «Հայկական ժամանակ» օրաթերթին և եղել են թվով 8 հոդված:

«Դեկտեմբերի 7-ին ՔԿՀ ներկայացուցիչ պարոն Ա. Խաչատրյանը ինձ հայտնել է, որ «նեղություն չկրեմ, նամակներ չգրեմ, որովհետև դրանք միևնույն է չեն ուղղարկվելու»: Չնայած սրան, ես մինչ օրս բոլոր աշխատանքային օրերին ՔԿՀ ներկայացուցչին եմ հանձնում ծրար (օրեկան մեկ ծրար), որի մեջ իմ գրած հոդվածն է», – նշել է Նիկոլ Փաշինյանը:

Լրագրողը նաև ասել է, որ իր դիմումները սահմանված կարգով չեն գրանցվում 9-րդ ձևի մատյանում, ինչը ՀՀ ԱՆ ՔԿՀ-ների ներքին կանոնակարգի պահանջների խախտում է:
«Այս ընթացքում իմ գրած դիմումներից, եթե հիշողությունս չի դավաճանում, այս պահին գրանցված են միայն երկուսը, այնինչ իմ գրած դիմումների ընդհանուր թիվը վեցն է: ՔԿՀ ներկայացուցիչ պարոն Ա. Խաչատրյանը ինձ ասել է, որ, եթե գրեմ դիմումներ, որոնց հասցեատերերը գտնվում են ՔԿՀ պատերից դուրս, այդ դիմումները չեն վերցվելու: Հարցրել եմ, թե օրինակ գլխավոր դատախազին դիմում գրեմ, չի ուղարկվելու այն արդյոք, ինձ պարոն Ա. Խաչատրյանը պատասխանել է, որ` ոչ», – նշել է քաղբանտարկյալը:

Փաշինյանի խոսքով՝ նա զրկված է լրագրողական, մասնագիտական գործունեությամբ զբաղվելու,  արտահայտվելու ազատության, մասնավորապես` իր մտքերը, գաղափարները, իր վերաբերյալ տեղեկությունները տարածելու հնարավորությունից  և իրավական օգնություն` փաստաբանի խորհրդատվություն ստանալու իրավունքից:

Փաշինյանը նշել է, որ բացի Եվրոպական դատարան ներկայացված դիմումից այս պահին ինքը իրավական օգնության կարիք է զգում նաև մի շարք այլ հարցերի շուրջ, մասնավորապես, 11.11.2010թ-ին իր դեմ տեղի ունեցած հարձակման վերաբերյալ իրականացվող և առ այսօր իր համար անհայտ գործընթացի և իր անձնական անվտանգության ապահովման վերաբերյալ:
«Ես զրկված եմ նաև անձնական նամակագրություն վարելու հնարավորությունից, փաստորեն զրկված լինելով հարազատներիս հետ հաղորդակցվելու (այդ ձևով) հնարավորությունից: Այսպիսով, արձանագրում եմ, որ իմ դեմ ծավալվող քաղաքական հետապնդումները ավելի են ահագնացել», – փաստաբանի կազմած Արձանագրության մեջ նշել է Նիկոլ Փաշինյանը:

Նրա խոսքով՝ ՔԿՀ-ներում անցկացրած ժամանակաշրջանի իր փորձը փաստում է, որ արտաքին աշխարհի հետ կապի խոչընդոտների ահագնացումը, որպես կանոն, նախորդում է իր անձնական անվտանգության նկատմամբ կիրառվող ոտնձգություններին:

«Ակնկալում եմ, որ այս հայտարարությունը կարժանանա ԶԼՄ-ների, իրավապաշտպան կազմակերպությունների (բացառությամբ Արմեն Հարությունյանի գրասենյակի), ներառյալ միջազգային իրավապաշտպան կազմակերպությունների ուշադրությանը: Ակնկալում եմ, որ ՀՀ ՔԿՀ-ներում դիտորդական առաքելություն իրականացնող հասարակական խմբի նախագահ Ա. Սաքունցը անձամբ կզբաղվի տվյալ իրավիճակի ուսումնասիրությամբ և հանդես կգա հապապատասխան զեկույցով: Պահանջում եմ, որ «Արթիկ» ՔԿՀ վարչակազմը ՀՀ ԱՆ ՔԿ վարչությունը ապահովի ՀՀ Սահմանադրությամբ նախատեսված իմ իրավունքների և ազատությունների իրացման հնարավորությունը», – հայտարարել է Նիկոլ Փաշինյանը:

Արձանագրության կազմելու ժամանակ ներկա մայոր Խաչատրյանը այս առնչությամբ հայտարարել է. «Իրավական օգնություն ստանալու նպատակով դատապարտյալն իրավունք ունի հանդիպել իրավապաշտպաններին, իսկ տեսակցությունը տեղի է ունենում կարճատեւ տեսակցությունների համար նախատեսված կարգով` ՔԿՀ ներկայացուցչի ներկայությամբ: Իսկ տեսակցությունը չի անցկացվում կարճատև տեսակցությունների սենյակում անվտանգության նկատառումներից ելնելով»:

Նիկոլ Փաշինյանի փաստաբանը նշում է, որ Ա. Խաչատրյանը ներկա է գտնվել արձանագրության կազմման ողջ ընթացքին, սակայն, հրաժարվել է այն ստորագրել, քանի որ, ինչպես ինքն է հայտնել. «Արձանագրությունն իմ համար որևէ իրավական ուժ չունի»:
Արձանագրությունը պարոն Ա. Խաչատրյանի ներկայությամբ ընթերցվել է բարձրաձայն, ՔԿՀ հերթապահ մասի ընդունելությունների սենյակում: