Epress.am Լուրեր Հայաստանից
Վրաստանի նախագահ Միխայիլ Սահակաշվիլիի այցը Հայաստան մեծ դերակատարություն կունենա, այսօր լրագրողների հետ հանդիպմանը հայտարարել է Կովկասի Ինստիտուտի տնօրեն, քաղաքագետ Ալեքսանդր Իսկանդարյանը:
Սակայն փորձագետը չի կարծում, որ Սահակաշվիլիի այցելությունը հեղաշրջումային կլինի, քանի որ այն չի կարող գլխիվայր շուռ տալ առկա իրավիճակը:
«Վրաստանը Հայաստանի համար կարևոր նշանակություն ունեցող երկիր է, որի հետ չափազանց շատ խնդիրներ են կապված, բայց, միևնույն ժամանակ, բազմաթիվ հնարավորություներ»,- նշել է Իսկանդարյանը:
Նա նաև հավելել է, որ «տարրական պատճառներով» Հայաստանը երկու իրական հարևան ունի: «Վրաստանն այդ երկու երկրներից մեկն է, որը բավական կարևոր հարևան է, որի տարածքով է անցնում Հայաստան ներմուծվող և Հայաստանից արտահանվող ապրանքների 70%-ը»:
Նա նաև կարծիք է հայտնել, որ Հայաստանի և Վրաստանի առաջնորդների միջև առկա հարաբերությունները բավարար մակարդակի վրա չեն: