Epress.am Լուրեր Հայաստանից
Եգիպտոսի ընդդիմությունը կոչ է արել շարունակել Կահիրեի Թահրիր հրապարակում անցկացվող բողոքի ցույցերը, հաղորդում է Reuters-ը: Ցուցարարները կշարունակեն պահանջել երկրի նախագահ Հոսնի Մուբարաքի հրաժարականը:
Հերթական խոշոր բողոքի ցույցը սպասվում է ուրբաթ օրը: Իսլամական «Մահմեդական եղբայրներ» շարժումը կրկին հայտարարել է, որ չի բանակցելու Մուբարաքի հետ:
Ավելի վաղ Եգիպտոսի ռազմական ուժերի պաշտոնական ներկայացուցիչը ցույցերը դադարեցնելու կոչով դիմել էր իր համաքաղաքացիներին:
«Բանակը դիմում է ձեզ: Ձեր պահանջները տեղ են հասել, ձեր կոչերը հայտնի են բոլորին, ժամանակն է տուն վերադառնալ: Դուք փողոց էիք դուրս եկել ձեր բողոքը արտահայտելու, հիմա միայն դուք կարող եք վերականգնել խաղաղությունը Եգիպտոսում»,- ցուցարարներին ուղղված իր հեռուստատեսային ուղերձում հայտարարել էր ռազմական ուժերի խոսնակ Իսմայիլ Էթմանը:
Նշենք, որ Եգիպտոսում այսօր վերականգնվել է ինտերնետը, որն անհասանելի էր մի քանի օր: