Ցուցարարները արգելափակել են Եգիպտոսի խորհրդարանը

Եգիպտոսի նախագահ Հոսնի Մուբարաքի հրաժարականը պահանջող բազմաթիվ ցուցարարներ արգելափակել են երկրի Խորհրդարանի մուտքը, հաղորդում է AFP գործակալությունը:

Ցուցարարները տեղավորվել են շենքի հարակից տարածքում, որտեղ նրանք դեռ նախօրեին վրաններ էին տեղադրել` կենտրոնական Թահրիր հրապարակից տեղափոխվելով Խորհրդարանի տարածք:

Բախումներ առայժմ չեն գրանցվել: Ցուցարարները շարունակում են հակակառավարական կարգախոսներ հնչեցնել:

«Մենք չենք ցանկանում իշխող կուսակցության անդամներին թույլ տալ մտնել Խորհրդարան: Մարդիկ չեն ընտրել այս խորհրդարանը: Երկրի ղեկավարությունը պետք է հրաժարական տա, ոչ միայն նախագահը»,- գործակալությանն ասել է ցուցարարներից մեկը:

Եգիպտոսի զանգվածայաին բողոքի ցույցերը շարունակվում են արդեն 2 շաբաթից ավելի: Փետրվարի 8-ին ցուցարարները հրաժարվել են ընդունել այն բոլոր զիջումները, որոնց համաձայնել է գնալ իշխող ռեժիմը, և կրկին հավաքել են կես միլիոնանոց հանրահավաք Կահիրեյում:

Ցուցարարները ևս մեկ անգամ ապացուցում են, որ բողոքի ակցիաները չեն դադարի, քանի դեռ նախագահը հրաժարական չի տվել և նոր ժողովրդավարական համակարգ չի ստեղծվել: