Այսօր՝ խաղաղ ցույցեր ողջ աշխարհում. մարդկանց կոչ են անում կրել սև, սպիտակ, կարմիր

Amnesty International իրավապաշտպան կազմակերպությունը փետրվարի 12-ը հայտարարել է Եգիպտոսի ժողովրդի հետ համերաշխության օր:

«Այժմ ավելի քան երբևէ անհրաժեշտ է մեր աջակցությունը ցուցաբերել ցուցարարներին և մեր ձայնը բարձրացնել մարդու իրավունքների լիակատար պաշտպանության համար քաղաքական անցումային այս փուլում», – ասված է կազմակերպության հայտարարության մեջ:

Amnesty International-ն առաջարկում է աշխարհի տարբեր երկրներում ապրող մարդկանց միանալ «համաշխարհային գործողության օրվան»:

Դա անելու համար իրավապաշտպան կազմակերպությունը կոչ է անում միանալ խաղաղ ցույցերին, որոնք անցկացվելու են Ավստրալիայում, Բենինում, Կանադայում, Չեխիայում, Ֆրանսիայում, Գերմանիայում, Իսլանդիայում, Իտալիայում, Ճապոնիայում, Մալայզիայում, Մարոկոյում, Նորվեգիայում, Պեռուում, Պուերտո-Ռիկոյում, Հարավային Կորեայում, Իսպանիայում, Շվեյցարիայում, ԱՄՆ-ում ու Մեծ Բրիտանիայում: Կազմակերպիչները խնդրում են խաղաղ ցույցերի մասնակիցներին կրել սև, սպիտակ կամ կարմիր գույների հագուստ (Եգիպտոսի պետական դրոշի գույները):

«Մենք աջակցում ենք Եգիպտոսի ժողովրդին, Միջին Արևելքի ու Հյուսիսային Աֆրիկայի ժողովուրդներին, ովքեր պահանջում են բռնաճնշումների դադարեցում, մարդու հիմնարար իրավունքերի վերականգնում և շուտափույթ բարեփոխումներ:

Մենք դեմ ենք կանգնում այն բոլոր ուժերին, ովքեր փորձում են ճնշել իրենց իրավունքների համար պայքարող մարդկանց պահանջները», – նշում են հայտարարության հեղինակները: