Իրաքում քրիստոնեական եկեղեցիները լուրջ վտանգի տակ են. Ասադուրյան

Իրաքի քրիստոնեական եկեղեցիների մի շարք առաջնորդներ անցյալ շաբաթ հանդիպում են ունեցել Ժնևում միջազգային եկեղեցական առաջնորդների, ինչպես նաև Եկեղեցիների Կենտրոնական Հանձնաժողովի Համաշխարհային Խորհրդի (WCC) ներկայացուցիչների հետ: Հանդիպումը նվիրված է եղել ներկայումս Իրաքում առկա խնդիրներին, եկեղեցիների վրա գործադրվող ճնշումներին, ինչպես նաև ժողովրդի սոցիալական վիճակին, hաղորդում WCC-ն:

Իրաքի քրիստոնեական եկեղեցիների պատվիրակությունը խոսել է ոչ միայն վերջին ժամանակներս քրիստոնյաների նկատմամբ իրականացվող բռնությունների, ինչպես օրինակ 2010 թվականի հոկտեմբերին տեղի ունեցած կրակոցների, և Բաղդադում գտնվող կաթոլիկ եկեղեցում մահապարտ ահաբեկչի կողմից իրականացրած պայթյունի, այլ նաև ընդհանրապես Իրաքում ժողովրդի հանդեպ շարունակաբար տեղի ունեցող դաժանությունների մասին:

«Եթե այսպես շարունակվի, ես կարծում եմ, եկեղեցիները լուրջ վտանգի առջև կկանգնեն»,-ասել է Իրաքում Հայկական առաքելական եկեղեցու ներկայացուցիչ, Իրաքի քրիստոնեական եկեղեցիների առաջնորդների խորհրդի գլխավոր քարտուղար, արքիեպիսկոպոս Ավագ Ասադուրյանը:

Քննարկվել է նաև երկրում անվտանգության բացակայության հարցը, ինչպես նաև միգրացիայի խնդիրը, որը հանգեցնում է մեծ թվով մարդկանց արտագաղթի:

Չնայած ճնշմանը, Իրաքում գործող եկեղեցիները շարունակում են ակտիվ գործունեություն ծավալել, նշել են հոգևոր առաջնորդները:

Ասադուրյանը խոսել է նաև այն մասին, թե ինչպես են համայնքային քահանաները ակտիվ գործունեություն իրականացնում ծանր կենսապայմաններում ապրող մարդկանց մասին հոգալու հարցում, սնունդ են տրամադրում և գիշերելու տեղ հատկացնում:

Նա նաև ընդգծել է եկեղեցուն ծառայող կանանց խմբերի դերը եկեղեցու գործունեության մեջ. «Նրանք շատ ակտիվ են և իրավապաշտպան խմբերի անդամներ են: Նրանք այցելում են տարբեր ընտանիքներ` հասկանալու վերջիններիս խնդիրները, կարիքները և փորձում են ինչ-որ կերպ օգնելու վերջիններիս»:

«Բայց ամեն դեպքում կարիքավորներ շատ կան, և այն, ինչ մենք տալիս ենք, երբեմն չի բավարարում նրանց», – ասել է Ասադուրյանը: