Home / Հայաստան / Հայտնի գրողի հայտարարությունները Բերլուսկոնիի մասին սկանդալ են առաջացրել Իտալիայում

Հայտնի գրողի հայտարարությունները Բերլուսկոնիի մասին սկանդալ են առաջացրել Իտալիայում

Իտալացի հանրահայտ գրող Ումբերտո Էկոյի հայտարարությունները, որոնցում վերջինս երկրի վարչապետ Սիլվիո Բելուսկոնիին համեմատել է Հիտլերի հետ, սկանդալ են առաջացրել:
Չորեքշաբթի Երուսաղեմում տեղի ունեցած գրքի միջազգային տոնավաճառի ընթացքում Էկոն մեկնաբանել է Հյուսիսային Աֆրիկայի երկրներում տեղի ունեցող ընդվզումները: Պատասխանելով հարցին` կարելի է արդյոք համեմատել Բերլուսկոնիին Լիբիայի առաջնորդ Մուամար Քադաֆիի և Եգիպտոսի` պաշտոնանկ արված նախագահ Հոսնի Մուբարաքի հետ, գրողը նշել է, որ ավելի տեղին է համամետականներ անցկացնել Բերլուսկոնիի և Հիտլերի միջև:

«Ինտելեկտուալ տեսանկյունից, զուգահեռներ կարելի էր անցկացնել Հիտլերի հետ: Նա նույնպես իշխանության է եկել ազատ ընտրությունների արդյունքում»,- ասել է Էկոն: «Բերլուսկոնին բռնապետ չէ, ինչպես Քադաֆին և Մուբարաքը, որովհետև նա իշխանության է եկել իտալացիների մեծամասնության աջակցության շնորհիվ: Իտալիայում նման ռեժիմ գոյություն չունի, և չպետք է մոռանալ, որ ընտրազանգվածը պատրաստ է սատարել Բերլուսկոնիին: Դա բավական ցավալի է, բայց փաստ է»,- նկատել է գրողը:

Իտալիայի մշակույթի նախարար Սանդրո Բոնդին, ով միաժամանակ Բերլուսկոնիի «Ազատության ժողովուրդ» կուսակցության համակարգողն է, Էկոյի հայտարարությունը որակել է որպես «հիվանդագին ֆանատիզմ»:
«Մտահոգում է այն հանգամանքը, որ այնպիսի մարդ, ինչպիսին է Ումբերտո Էկոն, ցանկացել է նման համեմատություններ անցկացնել: Նրա հայտարարությունը վիրավորում է միլիոնավոր իտալացիների զգացմունքները: Ի դեպ, նա որոշել է դա անել հենց Երուսաղեմում»,- ընդգծել է նախարարը:

Նմանատիպ քննադատական հայտարարություններով են հանդես եկել նաև Բերլուսկոնիի մի շարք համախոհներ, ովքեր նշել են, որ միլիոնավոր իտալացիներ  Իտալիայի առաջնորդի անվան հետ են կապում ազատության արժեքների և ժողովրդավարության պահպանումը: